馬志威專訪｜馬志威殺父親一幕親寫內心獨白 曾患情緒病學懂淡然面對人生

隨着時間成長蛻變，由過往在片場戰戰兢兢的Edward，直言現時的他學懂放鬆，在今次拍攝上應對亦有所轉變：「以前嘅我會好緊張， 做晒功課去到現場咩都唔會改， 但今次唔係咁樣，我做晒功課，但我去到現場係掉晒佢，反而喺現場同演員交流 ，感受下個場景氣氛係點。 」

他深明「劇本係死而人係生」，反而演員之間的創作交流，可令演繹效果更好，「最有趣係去到現場大家撞嚟撞去嘅感覺，當我丟個波出嚟， 對方又接到再打番過嚟，呢種就係演員之間嘅火花。」

Edward自爆與馬貫東不時互相「Jam」新的想法，當中有一場阿東要問其借錢，原來最初劇本只是簡單交代，惟二人覺得出來的感覺不夠衰：「之後我諗不如叫佢扮狗仔再拍低，跟住阿東都係覺得唔夠衰，之後佢話你不如開張支票畀我寫$1000蚊， 我又覺得幾好 ，呢啲咪就係現場jam出嚟嘅嘢 。」

劇中他與前輩尹揚明和郭鋒也有對手戲，兩位也是好戲之人，合作必定獲益良多，對此Edward直認不諱，更可惜表示是次與鋒哥合作「唔夠喉」：「我好鐘意鋒哥 ，好欣賞佢嘅演技，但可惜今次同佢只係得兩場戲，我記得去到現場同佢對戲都做咗幾個選擇畀佢，睇佢覺得邊個較好 ，因為有時自己投入咗個角色， 唔知出嚟嘅感覺係點，而佢都畀咗好多意見我，令到出嚟嘅效果有驚喜。」

他演的「蔣基俊」壞事做盡，喪盡天良，絕對是觀眾心中的反派，但其實其內心孤獨，渴望父愛，根本不懂怎樣愛人，故在Edward眼中是一個悲劇人物，他直言最難忘親手殺父親那一幕，皆因他邊打邊說出多年內心對父親的鬱結，而那段心酸的獨白更是其寫出來。

Edward指初時劇本交代殺父親時沒有任何的對白，但他覺得要讓對方知道自己多年的心底話，「我記得我話 『寧願冇錢唔係姓蔣 ，剩係想你愛我』，就係呢句之後就殺佢， 我覺得呢個反差幾好，我同你講緊心底入面最想要嘅嘢 ，但係我隻手就做出最殘酷嘅行為。」

雖然今次Edward演活角色，令不少觀眾讚其表現出色，惟正正過往他屢演此類角色，更被封為「渣男專業戶」，難免被觀眾有所定型。

Edward明白在觀眾心中會將他過往與其今次的角度區分為反派，同樣也是做渣男，惟他站在演員的角度想法不一，「每個角色都有唔同面貌，人都有唔同類型，而演員嘅工作就係要有塑造角色嘅能力，令觀眾有唔同嘅感覺，咁先係最重要。」


向來勇於接受挑戰，不斷跳出舒適圈的Edward直言演戲毫無包袱，全因他望觀眾能看到不一樣的自己：「我唔介意做啲醜化自己或者要增磅嘅角色，我願意去嘗試唔同嘅嘢，好過我一成不變地用同一個方法演同一個角色 ，對於我嚟講都好悶。」

回望過去，當年27歲做速遞員的他，毅然放棄工作，跳入花花世界的娛樂圈，惟他原來初時從沒想過當幕前，只是一心想當幕後的工作，更從不認為自己是一名靚仔，「可能以前我係肥仔，小朋友嘅時候自我形象比較低，即使到我瘦咗入呢行，都唔覺得自己係典型嘅靚仔 。」

雖然最初Edward沒想過當幕前，其後全因他一個朋友認為其條件適合做模特兒，因而開展其人生另一頁，寫下美妙的篇章，而且，他更很快有機會拍戲，一嘗當演員的滋味。

在出道一年Edward便獲得「幸運之神」的眷顧，首次拍攝電影已當男主角，對於不是科班出身的他，當然感到無比的壓力：「嗰陣係咩嘢都唔識 ，又喺現場NG好多次，真係好緊張好驚，但我覺得係一個成長嘅過程。」

雖然一出道便有機會做男一，但其演藝路上並非一帆風順，他亦試過多個月沒有工作，以致不停懷疑自己，總覺得自己做得不夠好，在疫情期間更患有情緒病，不斷在低谷裏徘徊。

「當時隔離得太多次 ，我試過隔離咗90幾日，困住喺酒店又接觸唔到外界，情緒出現問題， 我記得一出去就即刻去睇醫生食藥，嗰時斷斷續續都食咗半年藥，嗰半年係唔想見人 ，但要工作冇辦法，唔使開工就成日匿喺屋企 好驚見人。」Edward說。

正正因為走出抑鬱的深谷，令其心態有所改變，明白到「路不轉人轉」的道理，「嗰時令我發現原來自己係咁脆弱，體會到唔應該逼得自己咁緊同對每樣嘢都咁執着。依家嘅我好願意釋放自己嘅情緒， 唔開心咪唔開心 ，攰就攰， 唔需要逼自己每日都要好開心咁過，所以我係用咗十年時間學識放鬆。」

而且，他自認過往是「工作狂」兼「完美主義者」，很在乎別人的任何評價，凡事要做得最好，惟經歷過疫情，加上年紀的增長，明白到珍惜當下，及時轉念才是最重要，「以前覺得工作係我嘅所有 ，但依家唔係， 我除咗工作仲有自己嘅興趣、家人、伴侶同朋友， 其實工作只係人生一部份， 唔使咁執着，所以呢個轉變對於我嚟講係件好事 。」

不過個性「佛系」的他，從不主動爭取，故在這個圈子打滾在別人眼中無疑會有所蝕底，Edward對此看得很輕淡然表示：「我覺得冇所謂，有時係你就係你， 唔係你嘅話強求都冇用。」

轉眼入行12年的他由模特兒搖身一變成為演員，Edward直認曾有過無數次想放棄的念頭，惟他熱愛做戲享受演戲期間進入忘我的境界，這種演戲的魔力，故成為其工作的推動力，令其一直堅持下去。

「十年磨一劍」一步步走過12年的演藝之路，自我成長了解，現時的他保持隨遇而安的心態，加上他明白到演員的工作十分被動，在這個圈亦有很多不確定性，很難計劃下一步，反而應該要把握當刻的任何機會。

在Edward而言人生有不同的可能性，不應「限死」自己要怎樣做才是最好，「 當刻我想做啲咩就做，可能突然我去流浪或者去某地方定居都唔出奇，根本冇得計劃任何嘢。」