楊洛婷與老公慶祝結婚10周年 在「張保仔號」拍攝靚相有意思：每日都係我哋故事新篇章

前港姐亞軍楊洛婷於2014年與樂隊Dear Jane主音黃天翱（Tim）拉埋天窗，今年是他們結婚10周年，更在巴黎和香港拍攝靚相紀念。

早前洛婷已分享在巴黎鐵塔下的相片，她透露一直很想與老公一同到巴黎拍攝，因此Tim特意安排這個驚喜之旅，錫太太錫到濃。

日前洛婷再晒出在香港登上傳統中式帆船張保仔號，與老公的甜蜜的合照，見她穿上吊帶晚裝，晒出白滑美腿，又與老公深情對望，大放閃光彈。

原來這艘張保仔號對他們而言別具意義，因為在18年前二人在此相識：「老公，結婚10周年快樂!💋十年前今日，我哋講咗『I do』 💍 ，但其實我哋嘅愛情故事喺更早之前就已經開始咗。一切都係18年前，我第一次擔任司儀🎤，喺『張保仔號』」開幕活動上緊張到不得了。我記得，嗰陣我喺幾百人面前心跳得好快，突然見到你嘅熟悉面孔。你嘅溫暖笑容同平靜令我覺得安心，你仲不斷同我傾計，令我放鬆咗好多。我哋跳咗一陣舞，仲交換咗MSN。❣️」

她指這些年來與老公相交相知，共同分享歡樂，面對挑戰，建立一個美好的四人之家：「我哋嘅生活就咁交織埋一齊，超出我想像。後來我聽到你朋友講，原來你喺2003年香港小姐比賽時就已經留意到我! 每一日都係我哋故事嘅新篇章，愛同挑戰令每一刻都更加珍貴。」

最後洛婷指老公在其人生佔有好重要的地位，望餘生繼續有對方相伴：「估唔到我哋嘅愛係由『張保仔號』啟航開始，走到今日我真係非常感恩。已經共度咗近半生，你喺我人生中佔有好重要嘅地位，希望『永遠共你去抱緊』，同你一齊走得更遠！Love you! 」