《直播靈接觸》最新集揭開了「紅衣女鬼」的真實身份，她就是有「翻版林夏薇」之稱的藝人彭翔翎。她曾於香港兆基創意書院讀了一年演藝課程，之後未有繼續演藝事業。直至她24歲，有感自己「再唔試就無機會」，於是決定投考第29期無綫電視藝員訓練班，最後成功成為TVB藝員，開啟夢想第一步！而她為了「追夢」更是有一段故，曾參選校花選舉、靚靚女女的翔翎曾經兼職做的士司機，這一段經歷也讓她獲益良多。
為追夢賣掉愛車
跟很多事一樣，「開始難，守着更難！」翔翎在正式做演員後，發現跟想像中有很大分別：「我想像中係好易，覺得自己能力HANDLE到，原來非常難，那怕一句對白兩句對白，你要用對白再加戲去表達一啲嘢係好難。」而困難不只於此，她還要面對剛入行的收入不足，以及無止境的等待機會。為了追夢，她甚至需要賣掉愛車，對非常喜歡揸車的她來說，真的需要很大決心！「隨住儲蓄一路無，我連車都賣埋，為咗追夢可以叫做捨棄一切，再自己重新慢慢揾個可行嘅方向去行。」
堅持只揸日更有原因 獲封「最靚的士司機」
最後，她為了增加收入支持自己追夢，於是投身於大家都沒想過的行業—揸的士！翔翎表示：「追夢是一件非常困難嘅事，首先你要維持到生活先。喺TVB做咗7年，一開頭都還可以靠自己啲積蓄，演員嘅身份，你唔會知道幾時有通告。如果你要喺出邊揾工有啲難度，因為你要畀更表人，無咩工作接受到你突然間請假，捱咗咁多年之後，的起心肝去揾一份可行嘅工作去兼顧。我又鍾意揸車，以前都有揸車，試下考的士牌，的士可以做工作又彈性啲，試咗之後OK，考的士牌都係為咗追夢。」
收入忽高忽低靠勤力幫補 揸的士最高每日收入是..?
收入方面，翔翎笑言自己無「師兄」咁叻，她口中的師兄就是在《愛·回家之開心速遞》飾演「書蟲」的林浩文，他是翔翎同期訓練班好友，現時也有兼職揸的士搵銀。翔翎笑言：「我哋同期入行揸的士，介紹咗行家畀佢。有次食飯果陣講起，佢試過最多一日可以揾3千蚊，我最勁最多2千淨袋，但我好勤力，我會走好多轉。最差試過一兩個鐘接唔單，因為我蠢囉，正常要識玩呢個遊戲。當時我喺屯門一個地方，望住個台，一見到有單想搶，但唔夠人搶。其實我應該要一路碌，睇下邊個地方會多啲客，去果邊行下。」
目擊輪椅長者搭的士被拒載感心酸 無懼被呠堅持落車協助
揸的士可以見到很多人生百態，翔翎分享自己最深刻是看到拿拐杖或坐輪椅的長者們很難截的士。「我遇到5至6次，佢哋一上車就話：『真係好啦，終於接我。』因為呢啲CASE 我一定會落車幫佢哋開門，幫佢搬輪椅，就算有姐姐陪同都會幫忙。我覺得佢哋好慘，其實佢哋好可愛，一上車都會笑，同我傾下閒計。往往就係因為動作比較慢，可能阻到後面被呠，但我都唔理，慢慢嚟慢慢嚟，最緊要安全。」
現時翔翎暫時沒有再兼職揸的士，而是找了一份文職工作，「當時的士揸咗兩個月，有朋友喺IG INBOX我話：女仔人家唔好揸的士，咁辛苦。不如你嚟我公司幫手，我請你做全職，最多你提早一日請我講聲，我畀你放假，扣人工便可。」她指自己會暫時做OFFICE先，始終的士牌和裝備還在，如有需要都可以隨時再做。
追夢獲家人支持 辛苦但無悔
追夢路上家人的支持十分重要，翔翎指：「屋企人好FREE，永遠鼓勵我，你鍾意做咩就咩，最重要我開心。FREE到直頭無問過我拎家用，呢種係非一般鼓勵。都有愧疚過自己，都咁大個人，係咪要進取啲呢，盡量揾多啲錢，有機會報答佢哋。」（有無後悔過自己這個選擇？）「無，無後悔過，因為細個已經好想做演員，唔係為出名，係想演好一個角色，那怕係演一個唔見樣嘅女鬼，我都好ENJOY投入去做，因為鍾意演，好鍾意玩古靈精怪嘅嘢，所以無後悔過，好開心，有好多經歷，多咗好多歷練。」
