陳豪在《萬千星輝頒獎典禮2023》憑劇集《破毒強人》再奪視帝寶座，阿Mo接受TVB娛樂新聞台《星光路上》主持潘盈慧訪問，大談得獎感受同演藝路上的點滴。
阿Mo繼07年憑《溏心風暴》嘅「得得地」一角成為雙料視帝後，相隔16年再奪最佳男主角，佢坦言心情更加平靜和有信心，而能夠在太太陳茵媺（Aimee）手上接過獎項，更覺意義非凡：「係好special，難得由我太太頒畀我，其實最想我攞獎嗰個反而係佢。我嘅壓力係……我都想畀一個喜悅佢，但唔敢肯定畀唔畀到佢！最後宣布結果嗰吓我係開心嘅，再開心係能夠喺太太手上攞呢個獎。」
呀Mo也表示16年前攞獎，覺得「個獎大過自己」，而今次獲獎，自己的目光已經不只在獎項，最重要的是印證自己所走的演藝之路是正確的。入行30年的阿Mo演藝之路曾歷高低，由模特兒走入電影圈，起初只抱住搵錢心態「雙線」發展，後來覺得做模特兒既空虛又不實在，所以才決定向演戲進發，可惜在電影事業上的發展未如理想。
雖然阿Mo有感心灰意冷，但他都未有放棄，一直默默裝備自己，等待機會來臨，直到加入TVB，阿Mo有機會參演《妙手仁心II》，更自爆劇中經常「插袋」扮有型嘅原因，又稱拍首部古裝劇《洛神》幾乎每一句對白都NG 50次以上，不了解四字成語的他，更將「瞻前顧後」講成「擔前顧後」，幸獲拍檔鄭子誠提點。
最後阿Mo隔空向Aimee發表愛的宣言，感謝對方願意在事業黃金期時選擇結婚、為他生兒育女，並自覺虧欠太太：「我好支持佢出嚟拍戲，尤其小朋友開始大，想佢追求番自己夢想。」
