佘詩曼殺青《正義女神Themis》 與契女食飯獲對方一句話提醒：及時行樂

視后佘詩曼這幾個月也忙於拍攝新劇《正義女神Themis》，與昔日舊拍擋譚耀文再度合作，二人必定擦出不少火花，阿佘甫出合照表示：「美麗嘅重遇，動人嘅故事，自如嘅對手，用心嘅演出，幸運嘅我，又一次完美嘅合作！」

日前劇集終於殺青，她今日（2月5日）在網上晒出與從澳洲回港的契女合照，並指「契女喺澳洲返咗嚟成兩個幾月，因為我拍緊劇，居然一日都抽唔到出嚟見一面，好彩喺佢走之前我部戲殺青，終於可以約食飯同佢傾吓偈。」

阿佘提到在飯局中因考慮晚上喝不喝咖啡一事，而獲契女一番話提醒，她表示：「佢提醒咗我寶貴嘅四個字『及時行樂』，有時會不知不覺畀自己一啲規限，所以要時不時提醒自己，做自己鍾意嘅嘢，氹吓自己開心，活在當下！」

全交如下：

契女喺澳洲返咗嚟成兩個幾月，因為我拍緊劇，居然一日都抽唔到出嚟見一面，好彩喺佢走之前我部戲殺青，終於可以約食飯同佢傾吓偈。

我哋食完Yakiniku之後研究緊去邊，Mui Mui突然好興奮咁話：「我諗到喇，契媽我想走之前食多一次pancake呀！」雖然我飽到爆，當然都會陪佢去啦～

去到門口佢已經指住張相話：「我要食士多啤梨嗰個！」

坐低咗，我係咁望住個Menu，佢問我想食咩…

我話：「其實我好想飲cappuccino」

佢話：「飲囉～」

我話：「但我驚瞓唔着，而家已經九點幾啦喎⋯」

佢話：「你聽日要返工咩？要早起身咩？」

我話：「唔使呀。」

佢話：「咁咪係囉，想飲就飲啦，我而家唔理㗎，總之我好想 做一件事，或者食一樣嘢，我話知佢肥唔肥，我都照食咗先，滿足咗自己先，開心咗先！你飲啦～」

最後，我真係叫咗杯Cappuccino，飲完第一啖之後，佢問我：「係咪好正呢？」，我好滿足好冧咁點點頭～

佢提醒咗我寶貴嘅四個字「及時行樂」，有時會不知不覺比自己一啲規限，所以要時不時提醒自己，做自己鍾意嘅嘢，氹吓自己開心，活在當下！