奔跑吧！勇敢的女人們｜尹詩沛形象百變扮乜似乜！粗獷豪邁導演變身火辣夜蒲女再展「反差實力」

來到2024年最後一部作品，尹詩沛再次為觀眾送上驚喜、展現極具新鮮感的全新人設。詩沛在《奔跑吧！》中飾演的楊子涵，與林采琳（吳若希飾）及沈洛澄（賴慰玲飾）份屬好友，並因戥好姊妹不值，一度看丁仲堯（蕭正楠飾）不順眼。為人直率的子涵，做起事上來雖然快狠準兼聲大大，但私下不但有感性一面，打扮起上來更絕對是靚女！昨晚，詩沛身穿低胸貼身戰衣，與好姊妹吳若希Jinny的喜愛夜蒲裝束便相當搶焦，與在電視台工作時的中性打扮極大反差，這亦是詩沛繼《企業強人》後，再度於同一套劇集中展現天花板級別的反差，難怪有網民直指「尹詩沛戲路廣，演咩似咩」。

談到楊子涵這個角色，詩沛接受TVB.COM訪問時，笑言是最貼近其真實性格的角色：「呢個角色可以話係最貼近我本人嘅角色，而我亦好開心終於有得做喜劇，我真係好鍾意同恨咗好耐！仲要個角色咁似自己，做起上來就更加爽同冇壓力。」對於有網民指詩沛在劇中難得地勁多對白時，詩沛直認不諱說：「開頭睇劇本，啲語重心長位都真係多對白嘅，但做起上嚟又好舒服，因為一來難得有深情嘢，二來啲對白又好貼地。」繼《神耆小子》後再與阿蕭合作的詩沛，笑指阿蕭是NG幕後黑手：「阿蕭本身個人非常好笑，所以呢套嘢如果有人NG，都係阿蕭嘅錯，因為佢真係好好笑，經常搞到人焗蟹。」她又謂與阿蕭會在現場主動幫角色加小動作及碎嘴：「好多嘢都係我哋自己度，所以都覺得好得意，睇番時亦覺得好開心。」

至於與Jinny和阿賴雖是首度合作，但詩沛和她們在劇中卻成功擦出不少火花，其中一場詩沛的醉酒戲份，不但詩沛將醉酒狀態演繹得十分像真，阿賴的「嫌棄」表情亦是相當到肉貼地！對此，詩沛坦言阿賴是很好的拍檔：「阿賴真係好好，佢每一日都會不斷好真心咁講好多讚美我嘅說話，係咁直線又曲線咁增強我嘅自信，真係好多謝佢。」又笑言開劇前有事先向Jinny「攞正牌抽水」，十分抵死，詩沛說：「我同佢講話我會加好多肢體語言落去，我會係咁掂佢，問佢介唔介意，佢都ok，所以劇入面一有機會，我會係咁摸佢同捽佢大髀。」