富貴千團｜傅嘉莉超貼身造型大晒完美葫蘆身形 360度零贅肉加結實背肌超吸睛

《富貴千團》除了兩大詐騙集團OPM及Smart Cap的鬥智鬥力、鬥心計鬥財技夠晒吸引，兩大女主角湯洛雯及傅嘉莉的造型及拼搏演出亦為劇集一再增添亮點。先說在上月《萬千星輝頒獎典禮》中勇奪最佳女配角殊榮的傅嘉莉（Kelly飾），Kelly在劇中飾演擅於操控人心（PUA）的Smart Cap中堅份子Irene，不但口才一流，身形與顏值同樣一絕。單以Kelly的出場戰衣來說，超貼身的剪裁將其美好身形展露無遺，堪稱360度零贅肉、零死角；至於另一套低胸波點公主袖戰衣，單從正面看已夠晒女人味，加上背部的修身剪裁及大露背綁帶設計，再次突顯Kelly超完美線條；而觀乎Kelly的數款露背裝，其背肌線條操得相當完美，尤其中間清晰結實的坑位，更是要付出不少努力才能操到的效果。

延伸閱讀： 富貴千團劇情演員名單｜全9集懶人包（持續更新）黃庭鋒/湯洛雯/姚宏遠/傅嘉莉 組「賺錢聯盟」

Kelly接受TVB.COM訪問時，笑言近日劇集出街後，監製亦忍不住大讚她拍攝期間身形甚弗：「監製最近都message我講咗三次，『你嗰陣真係好弗呀』，我都有因為咁即刻回顧番（套劇）。其實諗番起個拍攝真係心驚膽跳，其實出場嗰條裙，最大挑戰除咗係keep弗，仲有係收咪，因為支咪真係唔知點擺好。因為我哋用無線咪，即係主機能一條線有個咪頭咁，個主機真係好難收。而我出場嗰條裙，無論個主機擺喺邊都係會穿崩嘅，前後左右都唔得之餘，擺喺大髀中間又條裙太短喎，嗰時真係諗盡辦法。最後我要每拍完一個鏡頭，就要換一換個主機嘅位置，即係拍我back shot，我就擺番個主機喺前面，仲要每一次都要入廁所整，好攰呀！」