巾幗梟雄之懸崖｜莊思明演「叛變儀」獲讚脫胎換骨 感激曾勵珍帶她重返《愛‧回家》：試過成年冇嘢做

金牌編審張華標重返TVB操刀、並夥拍昔日《巾幗》系列好拍檔方駿釗（嘟嘟）監製的台慶劇《巾幗梟雄之懸崖》（下文簡稱《巾幗4》），將一連五星期、逢周一至周五晚八點半翡翠台播映。

延伸閱讀： 巾幗梟雄之懸崖線上看劇情劇透｜全25集懶人包（持續更新）黎耀祥/胡定欣/蕭正楠/羅天宇 共譜亂世情緣

一句簡單對白獲監製一早看好

飾演七爺心腹方儀的莊思明，前晚（30日）一集演出備受好評，無論是卑鄙無恥地冤枉十七、不可一世地玩十七、或是背叛七爺後自己因妒忌十七喊到眼淚鼻涕，都演繹到位，要衰格有衰格、要不甘有不甘，難怪獲網民讚演技脫胎換骨，並指《愛‧回家》是培養出色演員的木人巷。演戲資歷約12年的思明，原來之前憑在《跳躍生命線》的演出令《巾幗4》監製嘟嘟留下深刻印象，嘟嘟說：「當時佢做一個貪慕虛榮同現實嘅女人，佢嫌救護員老公賺唔到大錢而決定離婚，我好記得當時佢有一句對白類似係『當你嘅銀行要有一千萬，你先有資格講數字係唔重要嘅』，嗰句對白雖然好短，但佢不慍不火咁將好多現實嘅難處真實感出嚟，好Touching。」

監製嘟嘟大讚思明努力又專業：Wide Shot都畀足情緒

嘟嘟續指思明在《巾幗4》的表現亦很出色專業，即使拍攝大Wide Shot，她仍努力做好劇本要求的情緒：「我記得有場戲喺會議室，佢要跑入嚟喊住同大家講嘢，但佢喺門口Stand By時已係咁喊，當時只係拍Wide Shot，影唔清楚佢個樣，但佢都畀足晒戲，捽之拍咗四個Wide Shot左右，我見佢情緒去到頂峰，我就覺得要拍咗Tight Shot先喇，即刻作出調動，祥哥都讚思明值得一個更重要嘅角色。」

思明受訪時感謝監製嘟嘟為她Hold住方儀這個角色長達數年：「好感恩可以遇到呢個角色，其實《巾幗4》籌備咗好耐，最初籌備時嘟嘟已經話留咗呢個角色畀我，佢覺得好啱我，我最多謝佢經歷咗幾年後都冇動搖（呢個決定）、堅持將角色留畀我，我好感動。」又額外感激助理總經理（戲劇製作）曾勵珍2020年將她再一次帶返《愛‧回家》：「我入行第一套劇就係第一代嘅《愛‧回家》，當時我仲係好幼嫰，好慶幸嗰時已經有晴晴呢個角色令觀眾認識我；今次珍姐再次將我帶返去《愛‧回家》，令我有機會將另一面呈現畀觀眾睇，感恩珍姐喺我演藝路上不斷畀機會我同栽培我。其實之前離開《愛‧回家》後，我都經歷咗一啲低潮期，試過成九個月到一年冇嘢做。」

獨特瀏海造型原來參照呢樣嘢

思明笑言自己看第八集時也忍不住落淚，並感激祥哥及定欣幫忙帶她入戲：「定欣喺我喊戲度幫咗我好多，佢係好好嘅對手，佢有啲肢體動作好犀利，例如佢會喺啲好準嘅位度掂一掂我，我就會忍唔到（喊）架喇。至於祥哥，我第一日同佢做對手戲好緊張，因為係第一次合作，拍咗幾日之後祥哥同我傾偈，話我好似少啲拍劇，我聽到呢句時有啲驚，心諗死喇，係咪佢覺得我表現唔好呢？點知原來佢係同監製講話覺得我好，佢之後都畀咗好多鼓勵同信心我，真係好多謝佢同定欣。」談到角色造型瀏海勁特別，思明笑言靈感來自櫥窗公仔：「佢哋搵咗好多Reference，係20-30年代嘅百貨公司廚窗公仔。藝術總監劉世運好犀利，佢冇見過我哋本人，齋睇相就已經幫到我哋構思最適合嘅造型。」