異空感應丨何遠東死後顯靈戲致敬《降魔的》經典場口 東東爆獲監製吩咐要特別照顧陳曉華

主動加戲叫陳曉華嗌阿哥！拍動作戲親身上陣感滿意

出名好戲的東東，連續兩晚表現均相當亮眼，當中尤以在警局門口嘴gel gel與曉華鬥氣，及死後「顯靈」鼓勵可嵐兩幕最有記憶點。在警局門口一場，可嵐為了氹回小寶，不斷叫他「哥哥」、「哥哥」，令對可嵐恍榔樹一條心的小寶開心到爆炸，嘴角一再顯露藏不住的春風，但礙於面子又要扮厭惡，甚有喜劇。東東接受TVB.COM訪問時，透露場口是他主動提議曉華叫阿哥，並笑言受監製Amy姐所託要好好照顧曉華：「哥前哥後係我哋現場夾嘅，因為我知道之後要死，咁要呢兩個人冰釋前嫌咗，後面場口先會感動。雖然同Hera係第一次合作，但好感謝佢都好相信我，我就叫佢大膽啲試吓加嘢，好彩Amy姐都收貨，Amy姐交得個角色畀我，佢只係同我講，要好好照顧Hera。」東東又笑言自己「死得好」：「成個動作一Take過，我好開心呀，真係自己做架嘛！」至於顯靈部分，不少網民想到東東在《降魔的》經典一幕，對此東東亦有同感，並謂收到劇本後給予自己的功課，是絕對不能哭：「因為我知道陳曉華一定喊到豬頭咁，佢最後亦一如所料喊到變咗豬頭。」