異空感應大結局｜阮浩棕感恩Duncan獲認可 望無負「上等孫」之名 喜獲爸爸開腔讚賞：個仔終於識做戲

阮浩棕透露，近日無論出街或是坐車，多了不少市民跟他熱情打招呼：「多咗好多人叫我Duncan，同埋問我之後嘅劇情，真係非常開心。」問到會否因而增強了在頒獎禮勇奪男配或男飛躍的信心，阮浩棕說：「好坦白講，攞獎我冇乜特別大信心，一來想保持平常心，二來競爭真係非常激烈。獲獎項係緊要，但更加重要係觀眾嘅喜愛，同埋希望大家覺得我係實致名歸，而唔係德不配位。」

問到之前曾遭爸爸阮惠源批評戲屎的阮浩棕，對阮浩棕這次在《異空》的表現有何評價時，阮浩棕開心謂：「我爸爸今次真係有讚我喇，佢睇咗我演出話我做得好，同我講話：『個仔終於識做戲喇』。」之前曾表示希望搣甩「上等人個孫」稱號的阮浩棕，坦言今時今日有了新的想法，並謂只希望能對得住這個身份：「我依家冇諗太多喇，當然以前會唔想人哋淨係記得我呢個身份，反而依家接受咗。最近《異空》出街，好多人認識咗Duncan，亦因為呢個角色認識到阮浩棕，但到最後好多人都係叫番我『上等孫』。呢一刻我會為呢個身份自豪，亦覺得更加想要對得住呢個身份；嫲嫲在生時成日讚我做得好，好想對得住佢嘅讚賞。」

阮浩棕又坦言「星三代」身份有辣有唔辣：「呢個身份係易畀人認識嘅，但如果未準備好而去接受呢啲機會，其實會有影響，呢行好多時機會都係一把握唔到就轉眼即逝。同埋呢個身份容易令大眾會覺得我依靠關係，而唔係靠努力。亦因為咁，呢個身份逼使到我更加要努力去做好，唔好辜負嫲嫲或者爸爸，對我嚟講係另類嘅鞭策。」

談到11年的演藝生涯，阮浩棕坦言並不容易，並以「一步一腳印」形容：「我都真係去到上年先正式透過作品畀大家認識到我呢個演員。呢11年有好多苦真係自己先知，我其實都係由藝訓班開始做起，有演過路人甲，亦試過半年冇嘢做、冇工開，在內地發展時亦試過被壓價。「我喺入行頭嗰七、八年，其實一直都係低潮位，係辛酸嘅，但冇一個話特別特別辛酸嘅例子，因為整體都係谷底下嘅感覺。呢啲真係自己先知，所以我會形容我係捱番嚟。」入行初期，阮浩棕一度被調往兒童組發展，可惜即使他如何努力、幕後同事如何力撐他，成績依然不此預期，令阮浩棕一度大感心灰：「當時就算幾努力，都真係得唔到小朋友好大嘅喜愛。但好彩森美大哥有開導我，佢教我做主持最重要係帶到價值畀個節目，有時要百厭少少先跳出到框框，亦都係佢幫我渡過咗呢個難關。」