黑色月光丨林景程化老妝與何廣沛做父子 自嘲保養差與對方10年前演同學

對於今次特意化老妝演繹，景程接受TVB.com 訪問透露每次也要用一個多小時化妝：「每次開工前都畫白頭髮，要用銀筆逐條咁畫，後期大家都熟手同有經驗，梳化同事2個人同時幫我畫，一個鐘內都交到妝頭。（坐咁耐會唔會好辛苦？）都唔會，因為我一坐低化化下妝就會瞓着。」

而且，劇中他與相差4年的廣沛演父子，同樣引起網民討論，對此景程說：「最初聽角色我以為係演佢回憶中小時候嘅爸爸，但聽聽下先發現原來係演依家，我覺得加埋個妝，拍出嚟自己睇番都唔算有違和感。」

他續說與廣沛在10年前已經合作，並自嘲保養差：「當時我哋喺《M club》演同學，10年後佢仲係keep得好好，而我就保養得好差。」

過往景程大多演正經戇直的角色，今次他首演奸角壞人，感到很有新鮮感：「我覺得壞人嘅可塑性高過好人好多，作為演員都好希望可以試到唔同嘅嘢，所以當我知道有份做《黑色月光》已經好期待，好希望可以做到壞人。而且，今次唔單只可做壞人，仲可以做爸爸，簡直係滿足晒我兩個願望。」