黑色月光｜鄧伊婷獻螢幕初吻竟與彭于晏有關？自揭被虐打網民勁興奮

點讚

撰文：電視精二師兄

發佈日期：2024-10-29 12:55 更新日期：2024-10-29 15:36

由優酷視頻和TVB聯合製作的台慶劇《黑色月光》，由《新聞女王》總監製鍾澍佳與謝穎再度聯手炮製，並由關文深及權香蘭聯合監製，逢周一至周五晚翡翠台九點半播出，主要演員楊茜堯，王浩信、林夏薇、馬志威、黃翠如、楊卓娜、尹揚明、郭鋒、馬貫東、何廣沛及張頴康等。

昨晚（28日）首播的第一集《黑色月光》，一開場的公關阿姐Moon姐（楊茜堯飾）大戰呃錢網紅KOL寶兒（鄧伊婷飾）已相當精彩，並暗藏兩大亮點。劇集一開始已是繁華香港夜景加航拍影著王文傑（彭迪安Eddie飾）抱起寶兒床戰，之後事件演變成「激戰」，揭發被偷拍的文傑對寶兒拳打腳踢；由於出手勁重，文傑一度以為錯手殺人，逐找Moon姐出手拆局。Moon姐一殺到現場，即安排手下質寶兒食藥，及吩咐同事遙距起寶兒底及截停趕來的傳媒，最後以氣定神閒又咄咄逼人的手法，著寶兒交出床照的雲端Password，完美善後。網民笑言Eddie做回壞人相當有感，笑指「做好人始終適應唔到」，至於鄧伊婷則獲讚入型入格。

伊婷受訪時透露相關場口難度甚高、且相當考驗體力：「開場段戲Eddie由廳抱我入房雖然得一秒左右，但因為要就返航拍機，我哋係拍足幾個鐘嘅，佢抱我都抱到冇晒力。」伊婷續指是次是其「苦等」多時的螢幕初吻，並笑言當她向朋友透露對象是「Eddie Pang」時，朋友竟誤會是台灣型男彭于晏，相當搞笑。談到遭Eddie拳打腳踢，伊婷笑言：「Eddie仲緊張過我，好彩我哋之前拍《狀王之王》熟咗冇咁尷尬。我有有叫佢唔好留力、照做，我自己會識避，但最終佢都係唔小心真打咗我兩、三次，一Cut機時我真係痛到標眼水，但我覺得個痛感反而令件事更逼真。」並笑言：「好多人見到我畀人打都好似好興奮。」

伊婷續指能夠與楊茜堯有對手戲感覺很興奮，並直指對方氣場好強：「為佢《宮心計》姚金鈴個角色做得太好，我一直都有啲驚佢，到真係拍時，佢啲氣場真係嚇到我有啲場口係真心驚出嚟，都好多謝佢帶我入戲。」鄧伊婷以模特兒身份入行，曾是女子組合Super Gear成員及曾參選「大閘蟹小姐競選」。2018年憑綜藝節目《3日2夜》為人熟悉，與80年代當紅女星夏文汐是姑姪關係，驟眼看二人確實有幾分相像哩。