黑色月光｜「學霸港姐」王嘉慧百變反骨女PR顏值獲讚！被睇中拍《新聞女王》全因撞到佳導座駕？

港姐出身、自主持綜藝節目《通靈之王》後人氣急升、工作浪接浪的Cathy，背景相當猛料！父親有「內地傢俬大王」之稱，是著名傢俱公司創辦人，擁有約300多間加盟店。王嘉慧自己本身除了是一名學霸，（在倫敦大學學院修讀心理學，以一級榮譽及「Dean's honours list（獲院長嘉許名單）」成績畢業；回港後在香港中文大學讀法律系碩士），還有健身教練專業資格，另外無論畫畫、手作首飾、珠寶首飾設計、食物繪圖、櫻花繪圖、人手縫紉也難不倒她，堪稱「藝術全能」。

Cathy與佳導的結緣經過相當搞笑，事件因由竟是Cathy曾在公司停車場意外撞到佳導座駕，對此Cathy不好意思地表示：「呢件事講起有少少尷尬，當時我因為本身有其他Job miss咗《新聞女王》試鏡。然後有日喺停車場，可能我都有少少疏忽冇睇清楚環境，出車時突然撞到架車，然後就見到佳導落咗車，當時我都好驚佳導落咗車後反應會係點，因為佢架車都好價值不菲，仲要係新車，但我好驚訝佢落車後好冷靜，完全冇鬧我，仲要都好溫柔。之後隔咗一、兩個禮拜，突然再收到《新聞女王》試鏡通知，我覺得佳導真係好好，不計前嫌，仲肯畀機會我。我哋緣份就係咁開始，都唔好意思要以咁嘅形式同佳導初相識。」為了不辜負佳導一直給予好機會，Cathy拍攝《黑色月光》前還專誠找來實力派綠葉演員鄧智堅上堂學演戲：「佢幫我執聲同Body language。」

Cathy又大讚「上司」楊茜堯（阿怡）私下十分親切和照顧後輩：「佢同阿佘都係我好鍾意嘅偶像，第一次見到阿怡係緊張到唔知點叫佢好，但佢就主動咁打開話題。我同佢第一場戲就係拍尋晚呢場反面戲，當時我好緊張，好想做好佢，去到現場阿怡係咁同我講笑等我舒緩心情，到真係拍時佢即刻入戲，亦好帶動到我（嘅情緒），嗰場戲我拍得好enjoy。」Cathy又坦言單是站在旁邊欣賞茜堯拍劇已是享受：「係歎為觀止！我又記得有場戲好簡單嘅，但我硬係爭啲爭啲，我當時覺得好似連累到阿怡，但佢係咁鼓勵我話冇嘢，又叫導演畀多啲機會我，好多謝佢咁照顧我。」談到與Cathy的「撞車緣份」，佳導即大開玩笑謂：「如果大家想識我，直接搵我傾偈就得，唔使用呢個方法識我，唔該晒！」