無綫今屆奧運主持個個做足功課，搏盡為觀眾呈獻最新最快奧運資訊，直至目前為止，無綫巴黎特派專員先後搶贏了不少奧運選手的頭啖湯獨家訪問，除了有香港運動員及他們的教練外，還包括了中國國家隊甚至是海外選手。日前，唯一一位飛往巴黎的「奧運之星」鄭衍峰，便訪問了男子雙人10米高台跳水銀牌得主-英國「跳水王子」戴利Tom Daley，及其拍檔 Noah Williams。對於鄭衍峰的採訪表現，獲網友洗版式大讚：「鄭衍峰應該係歷年TVB最好嘅奧運採訪人員，語速好正，又快又流暢又通順又爽手，唔阻運動員時間，亦爭取時間問多幾題，最正係流暢地用番廣東話即時貼切地傳譯，聽得好舒服。」、「真心讚，鄭衍峰好多謝佢主動問Tom關於佢老公同兩個仔，仲講得出啲名。」、「有準備錄音留字做翻譯，英文又好，問題有內容，過程流暢，又會顧及訪問新人，用盡有限時間訪問，做得很好！」、「鄭衍峰訪問做得好好，一take過用英文順利訪問完就立即翻譯，用廣東話再講一次訪問內容出嚟，超強記性又講得好流暢，勁呀。」
另鄭衍峰於巴黎時間昨日特意向大會申請從馬賽坐快艇深入海中心，務求以最近距離直擊港隊女子滑浪風帆隊代表馬君正、因現場不夠大風而被逼暫停比賽的最新情況。片段所見，雖然大會表示現場風勢不足以比賽，但觀乎從馬賽拍攝回來搖晃感極重的鏡頭，以及鄭衍峰的一頭亂髮及現場的風聲，完全能確切感受到坐在船上的鄭衍峰與工作人員有多「朗」。另一個有趣位，是由於馬君正當時還在等候隨時回復正式比賽，故只能隔住個海接受鄭衍峰訪問；君正笑言原本比賽已進行了一小時左右，她亦滿意自己表現，可惜比賽最終要取消，不過樂天的君正笑言：「個天可能覺得我技術未夠，所以決定取消咗佢。」
笑言坐快艇出海做訪問似足做《東張》
事後訪問了在片段中揚言「上天下海幫你哋去訪問每位港隊運動員」的鄭衍峰，專誠出海訪問運動員的經驗是否很有趣？他說：「當日去到馬賽嘅比賽場地，奧運工作人員就帶我哋周圍行了解成個場地運作，佢問使唔使畀架快艇我哋出海，我哋梗係話好啦，原本去到終點位迎接馬君正過終點，但因為太細風要暫停比賽，暫停比賽時教練會坐快艇接番運動員上岸休息，我哋就喺海中心周圍兜搵番馬君正架快艇，兜咗大概廿分鐘，終於搵到馬君正同教練團隊架快艇！」鄭衍峰笑言今次經歷很有趣：「成件事好似做緊《東張西望》。」
難忘近距離目睹戴利與家人溫馨互動一幕
談到早前訪問戴利Tom Daley及 Noah Williams的片段獲讚英文流利，他答謝大家留意的同時，更化身「奧運資訊庫」謂：「好多謝觀眾有留意我訪問，我事前做定功課，睇晒Daley嘅新聞，其實Daley上屆攞到金牌之後已經退出咗，但係佢因為屋企人想佢參加多次奧運，所以重返奧運呢個舞台，我覺得好多香港觀眾都想知佢呢幾年嘅心路歷程，所以Set定問題幫大家問佢。」講到訪問Daley最難忘的事，他說：「 喺我訪問Daley時，頭頂就係觀眾席，企喺第一排望住Daley嘅老公同埋兩個仔仔，佢哋不斷望住Daley揮手打招呼，畫面都幾溫馨。」鄭衍峰續指會繼續訪問更多其他不同地區的運動員，他說：「Daley只係第一個，之後會陸續有嚟！」
