港隊羽毛球混雙組合鄧俊文/謝影雪在巴黎奧運8強遺憾止步,這是謝影雪最後一屆奧運,在接受TVB賽後採訪時,兩人亦忍不住落淚。其實謝影雪一直飽受傷病困擾,堅持到今屆奧運實屬不易,她今晚(2日)亦於IG發表長文,透露自己在奧運前一再受傷、且患上類風濕關節炎,訓練及日常生活都極為困難,令網民心疼不已。
延伸閱讀:巴黎奧運2024︱謝影雪鄧俊文8強賽遺憾出局 哽咽感謝拍檔互相扶持走過高山低谷
謝影雪表示平日不時會感謝身邊團隊,卻經常遺漏多謝自己,所以今次的第一個分享是留給自己。謝影雪坦言年輕時沒有傷患:「覺得所有事都好易,條路好簡單、好易行」。但謝影雪近年常受肩膊甩骹等不同傷患困擾,她指爭取今屆奧運資格的途中,與拍檔鄧俊文的狀態「已經差到好似唔識打波一樣」,也沒有信心去到奧運,幸好半年後突然回復狀態,可以打到年終賽,成功來到巴黎。不過,令她意想不到的是,今年1月在印度公開賽拉傷後,打針減輕膝頭痛楚,卻遇上藥物敏感,「有日瞓醒兩個膝頭腫痛到瞓覺時無法轉身,連去洗手間都要扶住,令好簡單嘅日常事都無法做到。年初二當日行去醫院搵容醫生條路時好似行咗好耐好耐,最後要坐上輪椅,兩日喺兩個膝頭抽出幾樽水。」禍不單行的是,謝影雪的身體在之後遇上更大問題:「好返之後以為應該可以好順利行落去,但到6月有一日起身,梳頭時發現兩個手肘痛到舉唔高,初時以為自己受傷,但第2日出發亞洲三站賽事,所以只可以食住止痛藥出發。」她回想當時三站賽事間,「每過幾天就會有多一個關節出現腫痛,到最後番到香港時,手指痛到握唔到球拍,練波都練唔到,好幾次練到一半瞓喺球場度忍唔住喊,做GYM時因為伸唔直雙手,所以要調較到唔痛嘅角度去做,然後一邊做一邊喊。」
謝影雪指當時不停上網找資料,檢查後結果不如人意:「最後經過8次MRI,同埋無數次超聲波及抽血,確診類風濕關節炎。上網搵資料時自己有一刻諗過,確診一刻雖未有晴天霹靂,但心入面都沉咗一下,但當時因為距離奧運只有唔夠一個月,我只係好想快啲有藥食,快啲將痛㩒住,可以令我正常練波。」雖然服藥後痛楚有所紓緩、能夠練習,但之後「好似壞嘅事會接二連三出現」,她表示:「一日後膊頭第8次甩骹,嗰一刻好崩潰,好好彩容(樹恒)醫生雖然忙梗都即刻飛去醫院。好記得麻醉藥後,我問容醫生我仲去唔去到奧運,之後佢好有信心同我講無問題!令我本身由好崩潰變得安心落嚟。」謝影雪指當時不敢去港隊的奧運授旗禮,「唔想人人準備十足迎接奧運時,我就托住手去影響大家士氣。」她休息兩日又再重返球場訓練,「可能係奧運令我勇氣大咗,每日都鼓起勇氣去試唔同動作,因為望住俊文自己練,我都好想快啲跟上佢嘅進度。」謝影雪坦言當時自己真的非常崩潰:「點解好似好多事去阻止我去巴黎一樣。」
對於今屆奧運,謝影雪表示自己其實很矛盾:「一方面我好想去享受,一方面又好想奧運快啲完,因為好期待整個人可以放鬆落黎嘅一刻。呢三年我覺得整個人已經谷到我自己嘅極限,但呢一刻我係好開心我可以做到自己目標,可能大家都講想我哋拎牌時,我自己就好想去享受呢個舞台。」而她也非常開心今次有做到這一點:「比起上一次,我更發揮到自己嘅能力,可以打番出一個似謝影雪嘅比賽比大家睇,雖然今屆成績無上屆咁好,但對於發揮,我係今屆比較滿意。」而謝影雪也在最後感謝自己沒有放棄:「我覺得呢啲事比以前既謝影雪遇到,可能已經一早放棄咗,但經過今次,我覺得我真正學識咗及做到自己嘅座右銘。我都要好多謝我嘅身體,多謝你18年來比我用到五勞七傷,抱歉無將你哋照顧好,我以後會更愛錫自己了。」