巴黎奧運2024︱不論輸贏第一時間直擊運動員賽後感　網民激讚無綫奧運真．專業：唔係一味靚仔靚女

昨日無綫最令人動容的專訪，來自港隊運動員何瑋桁，桁仔於奧運男子重劍32強比賽止步，莊琬晴及陳銘泰第一時間貼身獨家直擊桁仔賽後感，並與身處香港、同樣是港隊劍擊隊的連翊希 （Coco）隔空連線。Coco一接通連線，即以甜美的笑容及聲音恭喜桁仔，並溫柔地安慰桁仔不要遺憾：「我見到你開頭領先咁多，我好為你驕傲呀，我知道你咁多年同佢打咗咁多次，佢係食住你。」之後當莊琬晴Edith柔聲地問到桁仔失落東京奧運後再踏上奧運舞台的感受時，桁仔即忍不住自責落淚：「我自己都知道我嘅對手我係唔夠打嘅，我真係好想贏！」桁仔說到此處即傷心拭淚並只懂說：「Sorry！」Edith見狀即輕拍桁仔予以安慰，Coco則大叫桁仔頂住兼打氣謂：「要硬淨呀！」、「你今日好叻呀！」互動相當感人。桁仔平伏心情後亦大派勵志Bite：「嚟緊我會繼續努力， 因為呢個對手我知係唔好打嘅對手，我同呢個對手打咗十幾年，一路以嚟打咁多次比賽未試過多過五分。但今日一開始領先咗，我覺得自己有機會，但係又把握唔到，我覺得…我可以再做好啲！」「跳遠王子」陳銘泰在旁聞言神情盡是明白及支持，更身同感受安慰桁仔：「作為運動員見到瑋桁行到奧運呢一步都知佢經歷咗好多好多。我知道喺劍擊界，會講女子重劍、男子花劍，你已經成為今年男子重劍第一人，都為你嘅隊友創造咗一個歷史，我哋仲好年輕，今次只係第一步！」

返回廠後，Coco再為港隊男子重劍運動員發聲，期間更數度哽咽落淚：「頭先我見到呢個真情流露嘅訪問，我自己都好感動，因為桁仔攞咗亞運會銅牌、亞洲錦標賽金牌，已經係破晒紀錄，創造晒男子重劍嘅歷史。但佢依然不卑不亢，我好想Shout Out To所有男子重劍嘅運動員…」說到此處，Coco聲音哽咽，邊抖大氣邊哽咽落淚謂：「你哋好叻…（我）仲激動過尋日呀，我覺得男子重劍團隊…成日都係只提女子重劍，男子重劍一路以嚟行咗好多嘅路，因為男仔比賽比女仔難打好多。所以好多好多男子重劍運動員，都好值得我哋香港市民關注。」對於無綫奧運表現，網民整體讚好，直指專業程度更勝從前：「唔係一味用靚仔靚女吸引人，奧運真係要搵Pro嘅主持。」