巴黎奧運港隊游泳代表何詩蓓、張心悅、譚凱琳、鄭莉梅、簡綽桐和何甄陶，今晨齊齊返港。焦點所在絕對是獲得兩銅的何詩蓓身上，加上東京奧運摘得兩面銀牌，其個人累積4面奧運獎牌，令她成為歷來香港運動員之最。港隊游泳代表甫步出機場即獲大批市民支持，6人企定定給傳媒拍照，何詩蓓更高舉兩塊銅牌展示給大家看。問到如何看待自己成香港史上獲得最多奧運獎牌的一位？何詩蓓說：「係一個好大嘅Honor，但我參加奧運目標唔係想成為最多獎牌嘅運動員，都係做足自己本份，盡力比賽盡力去游，可以為香港爭光係我嘅光榮。」
提到有人指她摘銅有「少少遺憾」，問到她有否覺得遺憾？何詩蓓大方回應：「我自己好享受今屆奧運，我目標都係好好發揮自己水準，同埋我成日都話比賽過程比結果更加重要，我過去三年訓練盡咗自己努力，做到自己最好，咁就冇遺憾，我明白我去奧運之前好多人對我有期望，佢哋對我期望唔係自己目標，我知道我同教練傾好咗嘅Plan同Goal係咩，我做自己想做嘅嘢就開心。每個人都有佢自己意見，我都唔係好理會其他人講法，佢哋都想講咩都冇咩所謂，我自己好少睇有關自己嘅報道，集中番喺自己想做嘅嘢就得。」問到未來的計劃和會否考慮退役？何詩蓓說：「呢樣嘢暫時未決定，我知道嚟緊有好多唔同比賽，暫時奧運之後會好好休息，之後再返嚟訓練，10月中有world cup，三站都喺亞洲，所以嚟緊都會為比賽準備。」
講到她說過今屆奧運最開心，問到為何這樣說？何詩蓓說：「因為今屆奧運氣氛好好，除咗屋企人可以去現場睇我比賽，仲有好多香港市民飛咗去巴黎睇比賽，喺場館同場外見到香港人同香港區旗，就好似一件盛事咁，大家一齊去慶祝香港運動員咁多年落嘅苦功。」她又指今屆奧運心態上有所改變:「之前為比賽覺得好緊張，希望到做啲成績，今次希望好好享受成個過程，因為我唔知道仲可唔可以再去到下個奧運，所以in case呢個係最後一屆奧運，我好想embrace成個moment。」
