港隊女子於4x100米混合泳,派出歐鎧淳、何詩蓓、簡綽桐以及譚凱琳出戰,合力游出4分03秒56,總排名第13位,初賽止步。她們於賽後接受方力申訪問。他先逐一問她們完成賽事後的感覺,當他對「五朝元老」歐鎧淳說:「請你總結一下自己練水20多年,做咗咁多年全職運動員,付出咗咁多,第五屆奧運會結束啦。」她聽着竟忍不住眼濕濕地說:「你講呢啲我會想喊。」
小方表示:「我唔想整喊你,咁你真係練咗咁耐水,真係做咗咁多嗎。你爹地、媽咪又喺現場,咁多朋友喺現場。16年啦,一啲都唔容易。」她稍稍冷靜後說:「好多謝我啲朋友同屋企人,我懷疑係第一次咁多人一齊嚟睇我現場比賽。最後多謝喺唔同階段支持我嘅人,可以今日行到嚟喺巴黎游到比賽,代表到香港,所以真係好感恩,好開心最後係佢哋陪我一齊游,多謝大家。」首戰奧運嘅簡綽桐,就指自己相比上一次的接力賽,「無咁緊張,盡量享受過程。」譚凱琳就覺得自己好榮幸,可以代表香港參加東京奧運和巴黎奧運,有幸見證游泳隊奪牌,「好珍惜呢個機會,亦覺得自己好幸運可以喺現場見証。」方力申向何詩蓓問:「你之前話對自己游得有信心,係因為落咗好多苦功。現時社會好多『快靚正』文化,就算做運動都係,好多都話唔駛練咁多,休息好啲咪得囉。你係點樣去練?話畀我哋年輕嘅運動員,究竟要做啲咩先可以成為奧運選手,甚至係奧運獎牌得主呢?」何詩蓓坦言:「我諗可能我由細個果陣,父母都畀我一個思想,『你一定要係好努力去做你想做嘅嘢,同埋要做一個好人』,我唔相信有捷徑,我唔覺得有捷徑,就可以好成功。我覺得如果你要成為成功嘅人,一定要下好多苦功,尤其當無人見到嘅時候,更加需要好努力咁繼續辛苦落去,我唔相信世界上有捷徑,可以好輕鬆去達到你嘅目標,可能有啲人真係好幸運,可以行到呢條路。但係由我自己嘅經驗,我嘅經驗根本唔係咁,如果你要成功一定要努力!」
當問到順利完成奧運最想做甚麼時,4位港隊運動員所想的都是跟食物有關,簡綽桐笑言:「只想食一塊餅」,譚凱琳:「好想食雪糕,同埋想開睇咗十幾日嘅可樂。」何詩蓓:「好想食雞蛋仔。」歐鎧淳指自己:「只想幾時食就食,唔想食就唔再食。」