巴黎奧運2024︱ 杜凱琹乒乓女單對戰北韓選手惜敗 指已盡力發揮 收拾心情應付混雙8強戰

港隊杜凱琹乒乓女單剛對戰北韓選手，惜敗未能晉級32強，TVB在賽後找到杜凱琹接受訪問。她坦言對方實力真的很強，「基本上自己已經都發揮得差唔多」，她指自己現時要先收拾心情，以應付當地下午舉行的乒乓混雙半準決賽。

杜凱琹一開始先多謝全港市民的支持。「雖然呢場波輸咗，但我覺得其實基本上自己已經都發揮得差唔多。對方朝鮮（北韓）都係傳統以嚟都係好硬淨嘅隊伍，的確佢哋出嚟比賽好少，但係實力的確係非常強，其實自己都打得唔錯。而家就收拾下心情，準備下晝嘅比賽混雙八入四。」

當被問到是否早知對戰這位選手，都打出了自己的部署，已發揮得最好？她表示：「因為我哋女單抽簽，大家都有話邊個會係幸運兒抽到，因為朝鮮（北韓）嘅女單得一個，我就中咗奬。」她指賽前可以研究對方的錄像比較少，「得亞運佢打過一次。其實整體上喺場上嘅戰術、發揮都係差唔多。」她又分析自己的表現：「的確自己嘅正手位失誤比較多，呢個都一啲進步空間。」

杜凱琹在第3局，以「刁時」追回一局，但之後還是被連取兩局。她表示：「其實第3局我都係2比6落後，當時叫暫停，係因為如果去到0比3， 就會更加被動。因為對方嘅無謂失誤的確好少，實力又比較強，所以我都係一分一分咬。」接下來她將會連拍擋王鎮廷，出戰混雙八強，「下晝我哋混雙對西班牙，其實我哋最近一次對決，都係輸咗。琴日我哋睇錄像都睇到幾夜，希望全力以赴去搏人哋。」