「萬能鍾」鍾志光(鍾SIR)入行35年，為大大小小不同的體育節目及大型節目擔任評述，是香港著名的體育評述員，只要你喜歡體育，都會聽過他的聲音。巴黎奧運即將開幕，鍾SIR將跟以往一樣，陪伴着觀眾一起看奧運！小編今次特意專訪鍾SIR，看看專業的他，是如何「備戰」奧運！
多年來保持剪報習慣 堅持專業報道
每屆奧運都會有新血加入跟鍾SIR一起擔任主持和評述，他表示期待，「佢哋兩文三語好好，現場翻譯可以幫到好多手。至於我，因為我好鍾意體育，不存在因為奧運而要再睇啲咩訊息，平時都有留意開啲資訊，包括運動員訊息，奧運情況，見到報紙或網上資料如果有用，我都會KEEP起佢，到要用果陣再拎記事簿出嚟，有啲咩特別提醒。」
他補充：「奧運除咗體育，特別開幕禮，有好多獨特文化，咁呢啲就要由頭做工夫，例如塞納河做開幕禮，塞納河嘅歷史價值喺邊到呢，歷史意義喺邊到呢，點解會揀佢呢？類似呢啲當地嘅文化特色，我哋都要有少少認識。如果唔係，一開幕禮做，淨係集中喺體育喺運動員呢，我覺得似乎唔係咁全面。」
未曾言休 只向前望
評述體育多年，鍾SIR指自己能夠以興趣作為職業，真的很感恩。即使擔任同一個工作多年，亦未曾想過退下來，「以做體育為例，我哋其實永遠都係向前望，唔會向後望，今年我哋做奧運，你又會睇前面有全運會、世界盃，跟住期待又嚟下屆奧運同亞運，每年都好期待大賽出現，從來無諗下停低落嚟，我腦海中真係無諗過呢樣嘢。」
首次拍劇也是講波
不過就算不是足球迷，你也定必在無數的劇集之中見過鍾SIR的身影。 不知道是否鍾SIR講波太深入民心，所以他首次拍劇《醉打金枝》，也是飾演一位蹴鞠旁述員。
他憶述，當年應監製邀請參與拍攝劇集《醉打金枝》飾演蹴鞠旁述員，「當時鄺業生監製同我講，角色設計要識講波嘅人，佢話我哋寫唔到架啦，因為點去點樣剪都未知，不如有對白會拍咗先，拍好剪好之後再配音。」那次是鍾SIR第一次拍劇，他坦白起初很不習慣。「因為我一路做體育節目，體育節目好穩定，場波深夜3點開，我預打到5點完，最多加時射埋12碼，咪6點鐘走得。但原來拍劇唔係，亦都係我第一次拍，果時喺西貢外景場地，又要著古裝，朝朝6點返到公司化哂裝，坐巴士出去場地等，足足拍咗一個星期。」
獨有的「鍾」式評述
就是這一次，開啟了鍾SIR的演員新道路，更不止一次擔任主持人、評述員，包括《金裝四大才子》為才子比賽進行主持，以及在《桌球天王》擔任桌球比賽的現場旁述，種類大不同。如果有看過這幾部劇的觀眾，相信也很好奇，編劇到底是如何寫出如此有「鍾」式風格的對白。鍾SIR分享：「其實都係我自己發揮，特別係桌球天王，佢係即時有桌球比賽，同埋有好多臨時演員嚟做觀眾，又幾興奮，因為我當時講呢樣嘢，佢哋接受又覺得好好笑，現場有反應畀我，感覺好好。」
不強求反得到更佳角色
根據非正式統計，鍾SIR曾於TVB劇集中多次飾演警察、醫生和法律界人士等，其中「法律界」中，更演出總計接近27次，成為「御用專業人士」！當被問到接下來想挑戰哪一種專業人士角色時，他坦言沒有特別想試的角色。他又指演員某程度很被動，很難去要求想做甚麼角色，但有時卻會在沒有要求下，得到很特別的角色。「例如喺《反黑英雄》我做一個警司，類似《無間道》嘅黃秋生，呢啲角色唔係話你想要就有，有時有啲得意幾好玩嘅角色，我都好開心。」
成《愛回家》最強男團成員
（哪一個角色你覺得好玩？）他笑言：「佳叔囉，梗係好玩，人物性格好特別，好縮骨。」飾演佳叔更為鍾SIR帶另一個體驗，因為監製安排他加入《愛回家》四人組合「大四喜」，與劉丹、羅樂林及陳榮峻齊齊Rap！「同幾位前輩合作好開心，試咗RAP，但呢個始終唔係我個瓣，只可以當講波咁講囉！」
熱愛學習 視讀書為餘暇活動
早前，鍾SIR獲教大頒榮譽院士，讓他的高學歷再度成為熱話。他在畢業後，先後修讀康樂管理文憑、公開大學人文學科，港大中國語言及文學碩士，以及中大哲學文學碩士。除了康樂管理文憑外，其他的科目都與工作無關。鍾SIR解釋：「當時嘅諗法，既然可以再讀書，就想同自己興趣有關，再唔係諗同工作有關做大前題。」他又指透過學習接觸很多新事物，開闊知識領域和眼界。
在繁忙工作，要兼顧學業並不容易，但鍾SIR指分配時間很重要，「我當時將讀書當作餘暇活動，工餘時間就做。我哋呢個行業，原來對讀書有好處，因為我做體育節目會知幾時做，固定咗時間。開劇集，會知幾時到自己，會比較忙，但唔會個個星期或個個月都開足，除咗遇到世界盃，遇到奧運。反正時間好用，例如有3日開工，我呢3日掂就唔哂掂讀書嘅嘢。但原來我跟住有3日幾得閒，咁咪去圖書館。好感恩，有呢份工先令我可以進修，以我咁懶嘅人，唔係有呢份工，真係未必讀得到。」
延伸閱讀 巴黎奧運2024｜TVB主持陣容懶人包 鍾志光攜手逾40位專家直擊賽事！現役及前港隊代表坐鎮
