今晚（10日）舉行嘅乒乓球女團決賽，由今屆女單冠軍國家隊陳夢、亞軍孫穎莎以及隊友王曼昱對戰日本隊球手平野美宇、早田希娜同張本美和，最終以局數3:0成功衛冕！而喺先前男團決賽中，國家隊亦擊敗咗瑞典隊衛冕！乒乓球男、女團項目自2008年北京奧運會設立之後，國家隊已連續五屆蟬聯冠軍！而國家隊亦包攬今屆奧運所有乒乓球項目嘅金牌！
延伸閱讀：巴黎奧運2024｜國家隊樊振東/馬龍/王楚欽男子乒乓球團體賽衛冕奪金！樊振東超得意勝利pose搶眼
第一場：雙打賽 國家隊陳夢、王曼昱對陣日本隊早田希娜、張本美和｜國家隊3:2勝
開場雙打賽先由國家隊陳夢同王曼昱出戰。第一局前半段，日本隊狀態大勇，一直處於領先位置，將比分拉開至4分咁多，不過陳夢同王曼昱亦有慢慢搵到對手節奏，追和至8:8，其後由日本隊搶先攞到賽點，並以11:贏得首局勝利；第二局開始，依然由日本隊保持領先位，不過6:6之後，國家隊開始發力反超，連贏6球，最終以11:6攞返一局勝利；第三局，日本隊依舊由一開始保持領先，雖然國家隊喺中段反超，不過最終都係由日本隊以6:11取得勝利；第四局，日本隊嘅決勝局，呢一局國家隊狀態好好，以11:6快速取勝；第五局，兩隊決勝局，比分相當膠著，日本隊一直以稍顯領先嘅優勢壓制住國家隊，國家隊亦愈戰愈勇，經過一番苦戰，最終成功反超日本隊，以12:10驚險贏取勝利！
第二場：單打賽 國家隊孫穎莎對陣日本隊平野美宇｜國家隊3:0勝
第二場單打由國家隊孫穎莎出戰。第一局，平野美宇一開始就打出7:1大比分，衝擊力相當強，不過莎莎憑藉超強心態，一路追至10:10，最後更以13:11反超取得勝利，非常刺激嘅對陣！第二同第三局，莎莎亦乘勝追擊，以兩局11:6快速贏得呢輪比賽！
第三場：單打賽 國家隊王曼昱對陣日本隊張本美和｜國家隊3:1勝
第三場單打由國家隊王曼昱出戰。第一局開始，兩人比分差距細微，直至5:5之後，張本美和發力，慢慢拉大比分壓制住王曼昱，以10:8率先攞到賽點，王曼昱都穩定住心態，最後幾球一番苦戰，可惜最後都係以12:14落敗；第二局兩人比分基本保持一致，相當膠著，呢局由王曼昱首先攞到10分，最終以12:10贏返一輪！第三局，王曼昱11:7取得勝利；第四局，王曼昱決勝局，以11:6攞到最終勝利！
