現年30歲的「微笑劍后」江旻憓(Vivian)以「世一」姿態,在巴黎奧運2024女子個人重劍賽中勇奪金牌,亦是港隊在今屆的第一面奧運獎牌,相當叻女。身為Vivian隊友兼為無綫專業評述的連翊希(Coco)直擊Vivian奪冠,心情大為興奮兼感動,她在直播時說:「我哋唔喊嘅,真係超級感動,我相信全香港市民,唔止我,都係十分之感動,因為見到Vivian咁多年嚟一路一路咁進步,冇可否認由2016年起,大家已經睇好佢攞獎牌,但就成日好似爭少少,作為隊友,大家都戥佢心急同緊張,但見到嚟到2024年,巴黎奧運今次終於圓夢喇 ,咁我戥佢戥教練十分高興。」
身處巴黎的主持何振然除了成功訪問Vivian外,還成功找到Vivian教練Octavian-Petru Zidaru(Tavi)訪問,對於愛徒勇奪奧運金牌,Tavi以英文笑言:「我到依家都唔相信,可能聽日我會相信!」提到Vivian由零比四「絕地反擊」,Tavi 評Vivian「戰術穩定、自信及Motivated」,他又感激香港粉絲在現場的熱情打氣及支持,並笑言熱情度沒有輸給主場法國選手的支持者。
在頒獎禮後,Coco即時與Vivian隔空連線,感動到眼濕濕的Coco問到有否Enjoy比賽時,與Coco老友鬼鬼的Vivian笑言:「場地係你鍾意嘅紫色,好靚呀。」之後Coco問到回到選手村第一件事會做甚麼?Vivian可愛地說:「我要食士多啤梨!」氹得Coco笑逐顏開,錄影廠其他主持同聲說:「估中晒!」果然心有靈犀,之後Vivian續說:「好多謝你送畀我嘅士多啤梨花同埋祝福。」Vivian說罷便對着鏡頭狂派飛吻,Coco則以心心手勢回敬,畫面十分有愛。