每個人都有私家的美食List！《美食新聞報道》全新環節「星級飯腳」，請來星級嘉賓分享私家List！而第一次向節目組報料的市民是熱心的林先生，大家猜猜他是誰？
無錯！他就是林盛斌(Bob)！今集黃嘉雯(Carmaney)就跟住Bob到他經常幫襯的3間餐廳，大嘆「阿Bob餐」！
第一站：大角咀福全街
這間於位於大角咀福全街的泰國燒肉粉，是大約半年前朋友介紹Bob來的，他表示：「因為我經常揾宵夜食，半年前有朋友介紹嚟，食過泰國燒肉粉好好味！招牌胡椒豬骨湯燒肉卷粉呢個粉係嚟至泰國，好多人專登去唐人街試。老細揾咗個配方，改良成香港人口味。」
Carmaney試食後表示：「卷粉好彈同好滑。」Bob補充，這個胡椒豬骨湯湯底很暖胃，而且辣度剛好，如果想加辣或淡一點也可以跟餐廳說。燒肉方面，肥瘦均勻，即使浸了一會皮仍然很脆。
第二樣，試食的是手掌大般，厚切的鵝肝多士，Bob笑言：「雖然睇上去有少少邪惡，但都只係間唔中食一次。」鵝肝外脆內軟，且有少許流心，帶有油香，加入少許蜜糖。連同脆口的多士吃下，十分香口。
Carmaney借員工上菜時，笑問：Bob是否經常帶女生來幫襯時，對方在經過「排練」後，就說出：「佢好乖㗎！」
炒雞肉公仔麵是Bob熱烈推介，他指自己食過好味TOP 3！非常乾身，吃落好乾身，不油膩，可以加辣粉食更其好味。
第二站：太子彌敦道
第二站，Bob就帶Carmaney到太子品嚐港式鐵板餐！這間餐廳採用80年代餐室或冰室的裝修風格，現場更重現多個童年回憶，餐廳負責人家姐表示：「放呢啲懷舊物，都係想啲人知道我哋細細個鍾意扒鐵板餐、玩啲咩。」
說起港式鐵板餐，啖啖肉，配料豐富的雜扒餐相信會是很多人的首選。Carmaney也不例外，她點了一個巨人雜扒鐵板餐，當中有煙肉、流心蛋、司華力腸、牛仔骨、雞扒、豬扒以及薯條薯菜。她說：「我細個都有食過港式鐵板餐，細個媽咪唔會畀我自己食一個，佢會覺得小朋友食唔哂一個餐，一定係同阿哥家姐SHARE。」
Bob亦回憶自己童年食鐵板餐的事，「我以前細個屋企環境唔好，有機會可以鋸下扒，已經好開心。以前喺屋企附近有一間幾十年，幫襯咗好耐，細細個已經覺得，大個咗一定要帶小朋友食下呢啲鐵板餐，呢啲先有香港嘅感覺。」他補充：「同埋我鍾意一個餐百幾蚊，又有湯、有包、有嘢飲，又有啫喱。」Carmaney認同：「好抵食。」
第三站：銅鑼灣駱克道
最後一站，Bob就帶大家過海到銅鑼灣駱克道試食炭燒串燒！Bob表示：「香港串燒好多，呢間係用炭爐，炭爐所需心機時間較多。」
他推介了3款必食串燒！「燒阿波尾雞翼」，炭爐燒成功鎖住肉汁，令原味更出，肉質嫩滑、雞味重，皮又香又脆。
「特製燒雞皮」Carmaney試食後認為口感很像薯片，十分煙韌香口。
「月見蟹膏醬油燒飯團」是近期餐廳的代表作，上面有已醃製的蛋黃，進食時用紫菜包着飯團，濃濃的蟹膏味香，令人一試難忘。
辣酒燒
地址：大角咀福全街12-16號福全大廈地下A
金翠餐廳
地址：太子彌敦道749號地舖
炭番串
地址：銅鑼灣駱克道487-489號駱克駅18樓
