今集《美食新聞報道》「故事味緣」的主角是麵包店老闆KC，在物理系高材生的他眼中，整麵包就是科學，雖然整麵包系統看似簡單，只有麵粉、水、鹽和酵母，但當中的細微位和變化可以很複雜。他指自己在讀大學時，爸爸買了整麵包的書回來嘗試，製作過程讓他覺得很有趣。最後他選擇邊讀大學，邊在家整麵包，到畢業，更去日式麵包店應徵烘焙師，到儲足經驗後便開屬於自己的麵包店！
物理系出身的KC在製作麵包時，都注入了科學精神。以法包為例，KC就用了三種麵種來製作，第一種是讓麵粉吸飽水，「第二種係天然酵母種加鹽，呢個係我哋發明嘅，我哋叫佢鹽種。第三種就係放喺室温過夜，麵粉同水結合後，會增加麵團延展性。透過呢三款麵種嘅比例，我哋控制到個法包嘅香味同質地。」
市面上，有好多法包，我們怎樣知道何謂一個好的法包呢？KC表示：「我自己有兩個定義，食到小麥粉原味，皮似餅乾咁脆，係對法包嘅要求。法包太粗會影響傳熱，焗時影響佢膨脹，皮未必做到餅乾咁脆效果。色澤方面，佢應該係深褐色，焦糖化嘅顏色，起碼個麵粉有足夠長嘅時間，喺發酵同分解過程，製造麥芽糖出嚟。」另外，我們也可以透過切開麵包後的狀態去了解，如果垂直切開，見到一至兩個由下向上升的大氣泡就最理想。而當打橫切開時，皮下有大氣泡，就是最脆的位置。
酸種麵包是近期大熱的麵包，KC指：「先睇外皮，其次睇顏色，正常係深褐色。切開包，睇下入面啲組織。但唔一定有大氣泡就係好，有時我哋食佢個香，或者可能會食幾日，要求就唔同，就唔會要求大氣泡，而要綿密，均勻，中或偏細氣孔。」
以下是麵包店的皇牌，材料有天然酵母麵包配布里芝士、火腿、蘋果、覆盆子果醬，蘋果的清甜可以讓有微鹹香的火腿，食落不會過膩，布里芝士可增加奶香，配合自家製覆盆子果醬，可以讓每啖甜味都有變化，味道變得豐富。
瑪格美麗拿坡里薄餅，KC開發這款麵包是希望可以有適合一家大細或小朋友的選擇。
KC的父母不時也有來店幫忙，也會到果欄採購生果，確保品質。KC爸爸表示：「佢讀緊書學整麵包，生活情趣咪由佢整囉，我無諗過佢會開舖頭。自己可以有啲細藝，幫佢做下啲行政嘅嘢，放假同啲客傾下計，從而儲到一班熟客。」他又指兒子學歷不低，但就一畢業就選擇做烘焙學徒，人工只有數千蚊，但就學了很多技巧、整個工場流程以及認識了很多供應商，「佢果時個心已密謀儲到錢就開舖，我哋係完全唔知。」
KC認為開舖原因越簡單越容易維持下去，「我開麵包舖主要係因為我鍾意食麵包同埋我鍾意做麵包。咁繼續做落去個目標希望可以，之後如果有人鍾意做麵包，個生存空間可以大少少。」他同時亦希望可以告訴大家：「點解咁樣做法包為之正確，如果做到科學原理嘅話，起碼呢條法包，為之正確嘅法包，好食應該係咁定義，起碼有啲嘢話到畀人聽，有啲食物本應如此！」
Levain Bakery (鰂魚涌)
鰂魚涌英皇道856號君豪峰地下1-2號舖
蔡瀾也推介！尖沙咀北京道潮州菜
36年老字號 勁惹味鮮甜爆膏蟹
今集還有鞏姿希(Krystl) 帶大家到尖沙咀北京道，一間蔡瀾都推介的36年老字號潮州菜館。這間菜館的蟹，隻隻都鮮甜爆膏！以生醃膏蟹為例，滿滿的蟹膏，加上嫩滑的蟹肉，味道鹹辣適中，送飯一流！
豆醬焗蟹，蟹肉較實，充滿蟹香，而且豆醬不會太鹹，亦不會蓋過蟹本身的鮮甜味。
香煎蠔烙亦是招牌菜之一，大大粒蠔，香脆但不會太油，配合自製食法魚露加胡椒粉，味道層次更豐富！
華苑潮州閣 (尖沙咀)
尖沙咀北京道57號國都大廈2樓
