由「泰國通」胡慧冲主持的TVB Plus（82台）長壽節目《冲遊泰國》再添食，即將開拍第10輯！來到第10輯當然要搞搞新意思，除了有胡慧冲和冬蔭家族成員參與拍攝外，還邀來「新一代咪神」 黃婧靈（波波）強勢加盟！波波昨日（11日）從香港國際機場出發泰國曼谷拍攝新一輯《冲遊泰國》。
問到有份參與新一輯《冲遊泰國》心情，波波受訪時說：「好開心可以參與呢個節目，好多謝公司畀呢個機會我，同埋好期待可以向泰國通胡慧冲學嘢！」問到此行會否水着「泰」解放？波波興奮地說：「呢個一定啦，陽光與海灘喎，絕對唔可以嘥咗呢個機會，已經準備定水着帶去泰國，至於帶咗多套泳衣？呢個就賣下關子先，大家到時睇咪知囉！」提到最近有網友指她發福，問到會否怕美食當前增磅？波波笑言：「我會努力保持最佳狀態㗎喇，至於美食方面就只好淺嚐，唔會食太多，做藝人始終都要身材管理一下。」
對於《冲遊泰國》開到第10輯，胡慧冲受訪時大嗌感恩：「好多謝 TVB，可以畀我一個節目做咗10輯咁多，不過開心嘅同時亦有啲擔心，今次會唔會係《冲遊泰國》嘅結局篇？定係之後會踏入第11輯？呢個真係唔知，所以要繼續好好地做好個節目！」問到今輯行程？胡慧冲透露：「今次因為有波波出現，梗係要安排啲碧波暢泳嘅場面畀佢啦！之前無論冬蔭妹也好、叉燒姐玲玲也好，去親芭提雅都特別受大家歡迎，所以希望今次去芭提雅都會繼續受歡迎，之後仲會去一個叫大城府嘅地方，之前好多輯都想去嗰度，但結果都係冇去到，希望今次真係去到啦，同埋曼谷梗係唔少得啦！」胡慧冲又預告冬蔭家族會再添新成員，但就「講啲唔講啲」謂：「究竟係美男定係大美女？定抑或係又男又女嘅雌雄同體呢？呢個大家到時就會知！」
