萬千星輝頒獎典禮2024｜陳懿德發長文感恩做司儀兼奪「最佳女新人」 鄭衍峰江嘉敏爭做「好朋友」

陳懿德在日前（19日）舉行的《萬千星輝頒獎典禮2024》擔任開場司儀，表現得到觀眾高度讚賞，而當晚她更奪得「最佳女新人」榮譽，令她相當激動。值得留意的是，德德專登在台上多謝了一位「好朋友」，並隨即引起熱議，大家紛紛猜測這位「好朋友」究竟是誰。

德德近日在IG分享花絮，並發長文分享當日感受，不少圈中好友如鄭衍峰、江嘉敏亦搞笑留言，爭做德德的這位「好朋友」。

全文如下：

「第一次參加頒獎典禮係東張主持

今次可以做到大會司儀 真係好開心

呢個係我最大嘅獎😭

一開始聽到自己要一個人做呢個show嘅時候其實好懷疑呢件事係咪真 亦都好懷疑自己係咪值得/係咪能夠勝任呢個show

畢竟我都係2024的3、4月先開始做司儀

但我只可以用我最大嘅努力、最好嘅一面去答謝呢個機會💕

呢個月真係用盡所有時間 閉關做功課

2倍速去睇哂所有入圍劇集 試過兩日睇哂25集😂

抄低大家講過咩深刻對白 同睇哂所有各大頒獎典禮做參考 包括以前萬千星輝 金像 金鐘 金馬 oscar

但最sad係做完show漏了陪伴我作戰嘅稿同notes…💔傷心到傻了

最感動嘅事係

有同事之前同我講：嘩 你啲懶音好勁

琴晚佢話：嘩 你真係進步咗好多

真係忍唔住要喊😭

作為一個司儀真係想做到字正腔圓

但想講俾大家聽 其實改懶音就好似改唞氣方式咁

你咁樣唞氣咗20幾年 突然間大家話你咁唞氣係錯嘅要改 其實真係好難

仲要諗稿嘅同時 再諗埋點pronounce 係雙倍嘅workload

但我真係改緊 應承你地會更好的

大家嘅評語不論好與否 都多謝每一位嘅你

每一個留言都令我進步

我好感激大家 好嘅留言 每一個都係好大嘅鼓舞

好感恩你地睇到我嘅好 你地令我相信自己都有點good enough

不過成長 就係要將本身嘅不足同唔擅長嘅變成comfort zone 所以多謝唔好嘅留言

我知道我真係未必係最靚最得人中意把聲最好聽

但我應承你地會努力逐樣令自己更值得

每次都比你地見到有進步

我知道自己把聲偏高 亦係我最大嘅concern

我事前綵排嘅時侯 係好刻意壓低自己嘅聲線

大家聽到覺得好似好平 所以我tune返high小小

但我睇返playback都覺得要tune返低

辛苦大家了 唔好意思

另外 好想特別多謝 @jarvischow （周奕瑋）佢知道我做司儀 同我講咗好多個電話 每次都一兩個鐘 毫不保留教我 同幫我做心理輔導 佢亦啟發咗我好多要點寫點演繹 多謝你🥹

亦都好想多謝 @mayannem （麥美恩）從港姐決賽到台慶

每次都令我大開眼界 原來做一個司儀要點

多謝你琴日紅地毯前鼓勵我 我會繼續吸收同享受每一個舞台

多謝 @edmondhui （許文軒）辛苦為大家聲音導航一整晚

好想對唔住爸爸因為佢早幾日生日 我因為閉關 淨係同佢簡單係屋企食咗個飯 love u

大家每次見親我都好開心

但其實我今年比咗好大壓力自己

有絲毫不足

都好對唔住個機會同比機會我嘅人

但我明白成長 就係要將本身嘅不足同唔擅長嘅納入comfort zone

但原來你改完上一樣 下次更大嘅挑戰都會再發現自己有咩不足

我唔會只沉醉於好評中 我更享受在負評中成長

所以請大家繼續發掘我嘅不足

我準備好一一改善 多謝

感謝的人太多 下一篇再繼續」