【Mayanne小喇叭】清談節目《MORAZ天然草本皮膚靈呈獻：Mayanne小喇叭》由新鮮出爐的「最佳女主持」麥美恩（Mayanne）擔任主持，曾展望（GM）擔任助理主持，逢周四、五晚10點半翡翠台播映。
一句「跌咗個Toy（胎）」笑爆全場
今晚（28日）Mayanne請來兩位同樣來自溫哥華的選美界好姊妹岑麗香及李亞男（Leanne）擔任嘉賓，開心share老公經及仔女經，平時望落溫柔又賢淑的香香及Leanne，私下原來流著搞笑又瘋狂的血。香香分享近日一則看似日常的「帶住細路接哥哥放學」事件時，不但表情十級誇張，說到肉緊處更忍不住愈講愈大聲；更因不諳廣東話將「跌咗個玩具」不斷說成「跌咗個Toy（胎）」，令全場陷入爆笑局面。
香香先是嘆氣表示：「開頭冇嘢嘅，細仔乖乖咁坐喺度，咁Bus mom（校車褓姆）會遞書包畀你，因為（大仔）五歲仲係好細個，你要Hold住佢跳落嚟，咁你就（不其然）放低咗另一個架喇。我一放低咗細嗰個，佢就調頭跑，跟住我就大叫Stop，佢就向住我笑，調頭再跑，癲咗呀！」當時仍拖著大仔Jacob的香香，只能拉著大仔追趕細仔，豈料大仔卻在緊要關頭「跌咗個toy」，當時香香望到迎頭有架的士即將駛至，她只能爆Seed保護兒子：「我好似慢鏡咁，即刻的起個仔攞埋個Toy，跟住架的士就過咗。呢個時候個細仔仲跑緊，跟住我就癲咗大叫Julias，我都見到啲街坊轉過嚟望住我，見到我滴晒汗。」Mayanne聞言即笑指若身處現場、必定舉機拍攝難得一見的「岑麗香咆哮」一刻，香香亦笑言當時有晒心理準備：「我唔理喇，人命緊要呀。」
可愛又精靈的香香分享御夫術時亦相當爆笑，並笑言有句「御夫必殺金句」，可令老公強強任勞任怨：「我老公係惡嗰個嚟，我會成日都讚佢『好x呀』，『你識教佢哋執枱，好x呀』、『嘩！男人幫小朋友沖涼，好x呀』，咁佢就會好願意去做啲事。」除了「御夫術」，香香還分享了夫妻分工教仔心得，萬勿錯過。
