鍾嘉欣佛山開騷狀態超Fit 父母罕現身撐場成焦點

鍾嘉欣（Linda）一連三場的「Remember記得・鍾嘉欣演唱會」佛山站終於圓滿落幕，嘉欣繼早前在廣州開騷後，相隔3個月再舉行個唱，反應熱烈，三場演唱會均座無虛席。

嘉欣網晒多張演唱會照片，見她狀態大勇，身材Fit 爆，完全不像三孩之母，今次演出亦令其有很大得着，並發文指：「今趟演出令我獲益良多，不論個人、舞台、團隊等，令我明白到要相信每個人的獨特之處。」她又指很開心見到大家離開時臉上流露滿足的笑容，感謝大家支持。

上次她在廣州站個唱，一班好姊妹及好友到場，令嘉欣大感驚訝，而今次佛山站亦有「重量級」觀眾撐場，原來就是其父母和細女Anika特意由溫哥華到佛山捧場，難怪對嘉欣而言別具意義。

她受訪說：「其實我入行咁耐，阿爸阿媽好少機會睇我演出，阿爸直頭係未睇過，好開心佢哋終於可以睇到，親身見證佢哋個女努力嘅表現。因為我大女同個仔都要返學，所以淨係細女嚟，佢都係第一次睇我演出，佢嘅反應好興奮，雖然佢戴住耳塞，但都睇到又跳又唱。」

相中見嘉欣媽媽打扮樸實但五官相當標緻，鍾爸爸則攬着太太，一家人齊齊合照，場面溫馨滿瀉。