黃庭鋒過五關斬六將任BLACKPINK Lisa港騷主持 與女神全程英語交流獲讚表現出色

無綫小生黃庭鋒樣子俊朗，精通多種語言，之前主持奧運期間，更因表現出色、大晒流利日文訪問運動員贏盡好評。近日庭鋒獲睇中為韓國人氣女團BLACK PINK成員Lisa在香港舉行的首個個人亞洲巡迴見面會擔任主持。庭鋒接受tvb.com訪問時，被問到為何會被女神睇中做主持，他笑言：「我Send咗自我介紹Video，然後經過佢經理人公司、主辦單位、韓國嗰邊批刻，最後決定咗係我，初初收到消息真係難以相信，更加唔相信係自己一個主持晒成個Show。」

庭鋒續指由於大部分流程差不多去到現場才決定，故此即時提早了六至七個小時抵達現場溝通及準備，仍難掩緊張心情：「今次係我加入演藝圈後，無論做主持又好、演戲都好，最緊張嘅一次，我用咗好多時間去消化呢件事、同一直認住點樣可以做好啲。因為有好多嘢其實唔知係點發生，主要係去到現場先同個Show嘅韓國監製傾應該點做，因為份事前稿主要都係啲簡單流程，去到現場好多變數。（你點同韓國監製溝通）全程有翻譯幫我哋，感覺都好特別。」