向來被視為「鑽石筍盤」的馬國明，去年12月正式「封盤」，與湯洛雯在泰國蘇梅島拉埋天窗，其後屢傳靚湯有喜，早前更有報道指馬氏伉儷為求成功造人而「馬明三遷」，由將軍澳搬到何文田，最近更升呢至月租7萬的九肚山豪宅，愛巢越搬越大、越住越豪，令馬明將榮升爸爸的傳聞更囂塵上。
無獨有偶，馬明今日在社交網站上載相片，並將個人珍藏及雜物放入迷你倉，並寫道：「正所謂：『Happy wife! Happy life! 』做咗差不多一年人夫，最緊要學識『斷捨離』！早排搬屋好鬼忙，趁住『馬國明天放假』，等我Pack好晒啲珍藏同雜物放入迷你倉，為咗迎接人生嘅新一頁、新身份而騰出更多空間！千祈唔好俾空間限制你嘅想像！」似乎暗示與靚湯造人成功，準備雙雙迎接人生的新一頁及新身份！此帖一出，網友即紛紛留言恭喜馬明，「恭喜馬明！喺咪要騰出多啲空間俾BB？」、「靚湯有咗？恭喜恭喜！」、「準備BB房? 恭喜哂」連圈中好友亦忍不住詢問馬明是否有喜事要宣布，加上馬明於字裡行間流露出開心又鬼馬的氣息，未知馬明與靚湯能否成為娛樂圈本年度的「壓軸喜訊」呢？
除了留言祝賀外，網友的眼利程度已經直逼電子鷹眼，其中有網友發現馬明的存倉物件中，除了最愛的唐老鴨精品、波鞋及模型公仔外，竟然驚現那些年的「日本女神」松隆子、廣末涼子與深田恭子的寫真集，並留言說：「馬明呢啲咪真男人囉，單身嗰陣大大方方認睇過AV；結咗婚就『送走』日本女神。」、「馬明有品味呀！呢幾本寫真當年賣到斷晒巿，估唔到佢都有珍藏喎！」想不到馬明一張執屋相意外地勾起一眾中佬的集體回憶，認真搞笑！
