尋夢琴澳丨馬國明一人分飾兩角冧爆林夏薇 豁出去上演「油膩男扁嘴二式」勁爆笑

馬明近年雖然甚少拍攝喜劇，但只要涉及搞笑成份的場口均表現出色！之前馬明在《隱形戰隊》中的「爆石」被撞破場面，便完全展示了出色的喜劇細胞，成功引發熱話。今次馬明再度喜劇大爆發，更「鄭子誠」、「霸道總裁」及「韓劇式暖男」同時上身，施展渾身解數冧爆薇薇。觀乎官方今日發布劇照，馬明與薇薇每場談情場口均Chok到盡頭地情深款款、齋睇相已相當爆笑；加上每個姿勢亦相當出位，不是壁咚、就是插褲袋，當中更有兩幕扁嘴戲，相當油膩；加上步姿完全六十年代Feel，感覺猶如「難兄難弟」李奇上身般！談到相關角色，馬明坦言十分好玩，並笑言自己十分享受拍攝喜劇：「個角色嘅演繹都係同監製度出嚟，因為我哋覺得網上騙子應該首先會經常用把聲去呃人，所以就諗到以音樂情人鄭子誠做原型，所以我講對白時會懶係電台DJ咁，懶冧懶溫柔咁，都幾得意、幾好玩呀，自己都好耐冇演啲喜劇感覺嘅嘢，雖然自己演戲唔係好叻，但其實都幾享受玩喜劇，希望出嚟觀眾都會睇得開心吖。」

除了「表象」（聲線加肢體語言），馬明角色的「愛情金句」亦相當肉麻搞笑，先後有：「無論你喺邊，我個心都係有你」 、「愛一個人，就係要冇理智」，還有劃時代的「不在乎天長地久，只在乎曾經擁有」，冧到薇薇暈得一陣陣。問到現實中的馬明會否都是氹老婆高手，對此馬明即大拋「簡單愛妻論」：「平時我氹女仔真係唔係好叻，但我覺得最緊要真誠，只要你真係對嗰個人好，我相信佢會感受到。即係譬如身為老公嘅，如果唔需要開工，就陪多啲太太，太太要去邊，你就車佢去咯，都係陪吓佢做日常生活嘢，盡可能得閒就陪住老婆。我成日覺得兩公婆只要陪伴就會開心，就算做好簡單嘅嘢都會好開心。」對此監製林肯補充謂：「因為騙子馬明現身嘅場口都係薇薇幻想出嚟，咁因為薇薇嘅角色好鍾意睇韓劇，所以就有放啲韓劇元素入去。」

另一推介場口，是薇薇與展鵬在夜幕下於噴水池上、脫掉鞋子又唱又跳，靚人靚景兼夠晒好氣氛，極盡視聽之娛。