反黑英雄丨6歲「童童」原來首次拍劇！林允晴速成學戲即變專業演員 綁架戲BTS一舉動勁pro

這位相當好戲的小演員林允晴，現實中尚有四天才滿6歲，幼稚園畢業即將升讀小一。《反黑英雄》去年9月開劇時，允晴只有5歲，而且更是她第一次參演的戲劇作品，首次演出已表現亮眼，非常有潛質。允晴擁有強大演戲細胞，似乎與平日在家中與父母相處有關！允晴媽媽受訪時透露，允晴在家中是獨女，很多時因百厭激嬲父母，之後會扮作可憐氹回爸爸媽媽；加上去年暑假，允晴父母為讓允晴訓練表達能力，安排她到了薛家燕創辦的家燕媽媽藝術中心上演戲課程，因而踏上童星之路。

談到拍攝時的難忘點滴，允晴媽媽指第一場的綁架戲最深刻：「大家未有心理準備要做啲咩，雖然係有劇本，但都冇諗到原來得兩個小朋友，仲要蒙眼，對小朋友嚟講係極大嘅挑戰，好在兩個小朋友年紀差唔多，傾得吓偈，大家就安心啲，始終有個小朋友陪住自己。但係嗰場戲係確實難，環境唔係咁舒服，始終喺一個比較爛地嘅地方，所以其實佢都有啲驚嘅，不過我都覺得允晴幾犀利，因為佢拍綁架嗰場戲，其實係越拍越驚，但佢係可以忍到拍完之後先大喊。」

允晴媽媽還分享與允晴排戲的情況，指爸爸專責與允晴記對白：「逐個字同佢讀幾次，然後我哋會同佢做角色扮演，扮演番劇本需要嘅角色，等佢知道嗰個畫面會係點樣，等佢有少少幻想嗰場戲係點，等佢投入啲。」允晴媽媽續指拍到近乎尾聲，允晴已十分專業，跳過父母直接跟PA哥哥溝通：「佢問PA哥哥『呢一場我要講咩呀，要拍咩㗎』，好搞笑。」劇集播出後，允晴更獲著名教育中心邀請拍攝宣傳片，由此見得這位小演員絕對是潛力股！

允晴妹妹綁架戲逐格睇：