法證先鋒6丨與關楚耀角色神撞樣驚艷網民獲封「法證Boys」 林景程大方回應騷錢點計法

相關場口除了夠驚喜，林景程的客串亦讓人喜出望外；雖然連Flashback鏡頭景程出鏡時間不多過1分半鐘，但連扮死屍場口前後共換了約11個場景，而且每次衣著及與蔡潔的互動均很不同，足證相關鏡頭背後拍攝落足心機；花絮片所見，只要有關楚耀、林景程必然都在現場，當然蔡潔與二人亦是不可分割。拍攝期間，關楚耀與林景程在對方埋位時，都必定眼定定望到實，及於手機拍下對方的演出，林景程受訪時透露拍片是為了記錄對方演戲細節，望「同步」效果出來更好：「我全程都要模仿關楚耀嘅演繹同動作，佢好多小動作，例如托眼鏡同摸吓頸咁，都係好自然咁會出現，要拍低係因為單靠現場睇留意唔晒，所以今次演出好多位都係靠即興發揮。」

「其實拍拍吓，我同阿關都入咗冼陽個角色，大家嘅演繹去到後期都冇乜差距咁滯。有時導演會叫我演先，等阿關再跟番我。」景程又笑指已忘記為了Flashback戲開了多少日工：「淨係記得成日都要開工，好似平時拍一套劇咁，大概7日左右吧。」對於這對「法證Boys」，網民笑言覺得二人不但神撞樣，就連身高也相當接近，對此景程搞笑又害羞回應謂：「事實上我哋一著戲服，就真係有啲似樣，只係佢瘦過我。我都未試過咁樣拍戲，我同阿關會演番同一段戲，之後劇組再抽番有用嘅嚟用。」