郭鋒專訪｜郭鋒亡妻離世7年仍後悔留憾 大嘆世界變灰色：想快啲同太太再見

入行半個世紀，在觀眾心中公認好戲之人的郭鋒，相隔7年再現幕前，在台慶劇《黑色月光》中演有錢人「卓昊天」，劇中角色老奸巨滑，渾身是戲的鋒哥，看得大家拍案叫絕！

鋒哥在劇中展現爐火純青的演技，令整套劇集張力更為提升，對於他再度回歸拍劇，他直言原來由監製關文深親自出擊邀請：「我同佢本身係羽毛球波友，有一日佢突然搵我，我都覺得奇怪， 打完之後就問我有冇興趣嚟TVB拍劇，之後我哋了解咗劇本，覺得角色幾好玩，加上我對演戲方面仲好有濃厚嘅興趣， 雖然依家我半退休狀態，但有咁嘅機會就一拍即合。」

由於他當年在《創世紀》演「霍景良」一角令人印象深刻，今次「卓昊天」同為反派，一樣奸到出汁，難怪令觀眾指「霍景良」再現，惟鋒哥表示只是觀眾對這個形象太深入民心，所以才會有這樣的感覺，惟自言每次拍新的角色必定會擺脫舊有的影子，「今次角色完全唔同，因為霍景良個角色比較直接， 你話佢奸唔係奸，只係喺商場上做生意嘅手段，而呢個角色係幾得意，佢有反覆未被觀眾睇清點解佢會咁做，令觀眾會有追看性。」

劇中他與林夏薇與楊茜堯不乏對手戲，鋒哥大讚二人也是很有想法肯聽肯做的演員，前者更是首次認識合作，故在試造型時，他特意留下與薇薇聊天溝通，了解對方是怎樣的演員，「同一個新對手溝通係好重要，加上之後有咁多場口唔知佢點樣發揮呢個戲 ，不過認識咗後覺得幾好，個心定好多，覺得佢可以幫到我，因為一套劇只係你自己去做冇意思， 亦會令整個戲嘅演出有缺憾，所以成功嘅戲係講求團隊合作。」

今次拍攝期間，鋒哥不幸中了流感說不到話，以致很多場口都需要配音，令其覺得美中不足，相當遺憾，「初頭佢哋係完全聽唔到我講咩 ，因為我連對白都唔係好講到，自己都好忟，好想講到對白畀對手聽， 咁對手做戲先可以有反應，都搞咗7至8日，我先開到聲聽到我講咩，依家聽落好好笑，但當時我真係覺得唔好意思。」

因此，他透露有差不多8成也要配音：「自己都盡量追番嗰個聲線，其實睇番都覺得麻麻地， 聽起嚟有啲有氣，有啲又冇氣，所以係差緊啲。」

由1972年參加第一期訓練班而入行的鋒哥，從影50多年，演過無數經典角色，在外界眼中他已達「教科書級演技」，惟他從不自滿，力臻完美，故對其而言沒有一個角色為最好，「自己睇番都係覺得不足，即使我有好多角色都做過，但點樣令到個角色去到另一個境界，所以創造角色係好重要。」

在幕前鋒哥屢演反派嚴肅古板，內裏實質鐵漢柔情，對太太歐陽珮珊極為深情，即使對方已離世7年，惟他對其的思念從不減退。

二人因拍劇認識，並在劇集《無語問蒼天》不知不覺埋下愛情的種子，繼而在1977年結婚決定攜手到老，兩夫妻多年來鶼鰈情深，同甘共苦，走過40年婚姻路，奈何2017年歐陽珮珊因病離世，令鋒哥傷心欲絕，更因而淡出幕前。

回想當時突然失去一生中最重要的人，鋒哥直言整個世界也變成灰色，做任何事也再沒有意思，「我前面嘅畫面係做咩都一樣， 直情覺得咩都無所謂， 嗰種無所謂係想快啲同太太再見，所以嗰時要我出番嚟工作絕對冇可能 ，你叫我歡笑係笑得到 ，但唔係個戲嘅角色，而有時劇情可能仲會觸發我某啲唔好嘅情緒 ，變咗自己唔受控或者整個人沉咗落去，只會影響大家。」

時間流逝，現時鋒哥在傷痛慢慢走出來，感謝其身邊的朋友陪伴左右，不令他胡思亂想，「 當自己一個靜落嚟唔諗係冇可能， 初時自己一個人都好沉重，依家因為時間耐咗會開懷咗。」

即使太太不再在身邊，鋒哥依然記掛對方，不但每星期也會到墳場探望，每天回到家仍然會與對方「聊天」，「『老婆我返嚟喇 』、『老婆我依家出去喇 』， 有啲人可能會覺得好傻，甚至係咪精神失常呀？ 我話唔係，呢個對我係一個習慣，好似刷牙洗面一樣，只不過喺生活入面做番比較接近以前嘅事。」

而且，他的手機背面一直放着太太的相片，全因對方是其「定海神針」。

他自言個性火爆衝動，相反太太冷靜理性，二人一凹一凸互補不足，「我見到張相就會個心舒服好多同時警剔自己做每一樣嘢都要小心 ，因為我幾百厭，成日都做得『過晒龍』，以前太太喺度嘅時候好多時都會話我，『你做咩啫 ？』、『你咁急做咩？」 總之要坐定慢慢諗，辦法總比問題多，所以依家佢唔喺度，要識得提點自己。」鋒哥說。

與太太攜手走過人生不同階段，鋒哥回望過去自揭對太太有遺憾，有一件事至今仍令其耿耿於懷，由於他一直以來熱愛運動，包括潛水、爬山、打波和跑步等，年輕時更愛玩賽車，喜歡那種刺激感。

「呢件事已經係80年代嘅事，嗰時我參加咗賽車比賽，我冇同太太講，後尾出賽佢先知，當時佢係唔開心，點解依家先話佢知。後尾佢身邊嘅同事朋友同我講，『你去咗比賽時佢要開工拍嘢，佢坐喺化妝間個樣揦埋口面，原來好擔心我嘅安全。』那刻我聽到心好酸，真係對唔住老婆，同埋我喺度嘅時候佢完全冇展露唔開心嘅情緒，咁先攞命 。」鋒哥說。

他指太太永遠也會以對方為先，做事不怕蝕底，「有時工作上蝕底嘅嘢，佢從來唔會怨， 但我哋喺側面見到就會為佢唔抵，佢係一個思考型嘅人，會慢慢同你分析解決問題。」

海誓山盟，天長地久，作為教徒的鋒哥在2019年遠赴以色列、約旦等地朝聖，更在當地加納婚宴堂與亡妻再立婚約，在眾人的見證下許下承諾，愛太太一生一世，即使對方已離開人世，對其的愛依然永相隨，「她永遠是我偶像，改變我一生嘅人。」