《福祿壽訓練學院》由阮兆祥、李思捷、王祖藍主持，昨晚一集Professor Fuk（阮兆祥）、Professor Luk（王祖藍）及Professor Sau（李思捷）進行第三輪訓練主題 -「生死對決」的第二回合「１對１扮嘢對決」，分別由Team Fuk的彭建豪對戰Team Luk的吳兆麟（Alan）扮演郭富城，及Team Luk的陳柏曦對戰Team Sau的蔡景行扮演劉德華；兩個回合最終由彭建豪及陳柏曦勝出，Alan及行仔跌入危險區。
延伸閱讀：福祿壽訓練學院｜24位學員分隊懶人包！3大強勢組合 爭奪真正扮嘢王（附Top Student名單）
自摸＋震波＋扭腰擰臀震撼全場
王祖藍雖然派出外形及聲線均與郭富城爭一截的吳兆麟（Alan）應戰，Alan唯一模仿郭富城的信心位，亦只是自己的「狂野之城冬菇頭」。不過經過祖藍連日來用心調教，逐個動作細節執到足之後，Alan演出成功震撼現場觀眾及網民，雖然輸了比賽，但卻吸獲不少正評。跟足城城《第四晚心情》經典裝束出場的Alan，大晒超強胸肌及「朱古力腹肌」，加上超結實大髀，及大量自摸、單眼、震胸及扭腰擰臀等動作，全場尖叫及歡呼聲不絕於耳。就連出名奄尖的伍仲衡亦讚不絕口：「你真係跳得好好，我略嫌有少少似鴨，好輕微架啫，尤其是你嗰幾吓（邊說邊扭腰擰臀），好似想人塞錢落你個褲咁，郭富城唔會咁架嘛。如果你能夠再收番嗰少少哩，就係舞台王者，依家就鴨店王者喇。」
而網民大讚Alan靚仔之餘，亦認為Alan值得更多機會：「應該力捧佢」，直指Alan輸得唔抵。Alan表演另一搶Fo位，是找來隊中扮聲能力極高的湯卓堅幕後助攻代唱，由於湯卓堅唱得近乎與城城一模一樣，成功贏盡正評，不少網民得悉不是原唱後大表愕然：「我仲以為係原唱」、「真係似到分唔到」。
