《福祿壽訓練學院》明晚播出的第九集，Professor Fuk（阮兆祥）、Professor Luk（王祖藍）及Professor Sau（李思捷）三隊的學員將進行「命運對決」、以抽簽形式進行一對一扮嘢對決，勝方直接進級，敗方直入危險區。本輪對戰形式特別之處是，學員本輪表演必須是海選後從未於舞台上表演過的，是次賽果由現場觀眾投票及專業評審江美儀及火火評分決定。
《Sat In The City》少女變Auntie搞笑依舊
本集表演環節是相隔14年載譽歸來的《Sat In The City》，為了召喚觀眾更多集體回憶，製作組重新搭建14年前第一集的「餐廳廁所」場景。雖然相隔14年，Handelababy（祖藍飾）、Hungry（思捷）及大Ex（祥師兄飾）全線少女變Auntie，但三人的搞笑功力及女人味未有半點減退，當中尤以自稱已升呢Handelauntie的祖藍keep得最好，不但全程眉頭眼額演活「中年少女心」，白滑香肩及刻意展露的事業線亦是相當搶眼。三位「中女」就《東張西望》報道的城中「女中醫取精」熱話進行gossip，由於「講啲唔講啲」引發連番爆笑誤會，期間Handelababy更悲痛大叫：「好耐冇嚟！」，又大拋經典對白：「我真係接受唔到咯」，令全場觀眾睇得相當開心。
三子暢談「扮女人心經」 阮兆祥：認真去扮女人，係對女性嘅尊重
談到相隔14年再以經典女人造型亮相節目，福祿壽三子有感而發，當中扮女人扮到出神入化的祖藍笑言「一生不可自決」：「其實扮女人唔係話鍾唔鍾意，有一半都係被逼，扮啲比較福相嘅梗係交畀祥師兄啦，扮男人梗係交畀捷爺啦，佢都唔肯扮女人嘅！淨番又苗條又細粒邊個扮呀？就梗係我啦。」更不忘自嘲：「我已經唔係baby，係Handleauntie喇，冇咗當年條腰喇已經。」思捷則直認唔鍾意扮女人：「我扮女人照鏡我就好憎我自己嘅衰樣，所以就Create咗Hungry呢個講嘢好忟憎、好爆嘅Character出嚟。但唔鍾意扮還唔鍾意，出到嚟個result係開心嘅，觀眾喜歡咪做咯。」祥師兄更感嘆「女人唔易扮」：「男人扮女人都唔容易係靚嘅一件事情，你認真去扮女人，係對女性嘅尊重。」
