Grand住去大阪丨陸浩明成C君狙擊對象施壓催婚 高海寧戒牛逾10年食吞拿魚腦天竟覺得似食牛扒？

一共三集的全新旅遊節目《Grand住去大阪》，由C君、高海寧（高Ling）及陸浩明（6號）主持，今晚（16日）首播、逢周六晚上8點翡翠台播映。

今晚播出第一集，三位主持出發前「grand住」在香港機場頭等候機室等上機，上輯《Grand住去台北》主持黃翠如驚喜現身「送機」，三人是次將於旅程大歎米芝蓮餐廳兼全世界最貴壽司、豪花數萬日元享受頂級spa之餘，更會每晚入住大阪不同的天花板酒店。

似拉麵碗嘅香檳桶浴缸？！首間介紹的酒店品牌向來以hip同style見稱，大阪此間則以大人遊樂場為主題，並由日本著名建築師安藤忠雄設計，其實已經噱頭十足。位於酒店頂層、佔地2,800呎、約51,058港元一晚，只此一間的Extreme-WOW套房，樓底4.5米高，加上超開揚落地玻璃，可以俯瞰城市景色；浴室的銀色鏡面浴缸，設計理念來自香檳桶，高Ling笑指形狀似足巨型拉麵碗，時尚又funky！房內還設有DJ台打碟，且隔音、防震設備完善，絕對是派對場地之選。

之後，C君、高Ling和6號帶大家到米芝蓮一星餐廳歎法國菜，一入門口高Ling已被古典裝潢吸引住，高呼「好classic」。三人品嚐了鴿肉鴨肝香料麵包碎、咖啡牛油烤鹿兒島和牛、干邑海藻燉煮藍龍蝦，6號食到和牛時誇張形容：「我覺得隻牛好似活生生喺條脷度奔跑緊！」卻被C君吐槽：「唔使講咁多架，我哋淨係話畀話觀眾知，好食。感受？觀眾自己嚟感受嘛。」