《東張西望》何伯日前被證實在未加名的情況下長住何太的公屋,房屋署署長羅淑佩曾表示會嚴肅跟進事件,並強調有違規必定執法。上周五(9日)房屋署向二人發信,指若何伯繼續居住在該公屋,就會再發出搬遷通知書。於是這幾日,無家可歸的何伯只能與何太四處找酒店住。
昨晚(12日),一網台收到報料,指何伯何太在天水圍一間酒店現身,並在警察陪同下拖篋走人,而後據閉路電視顯示,幾人再共同現身何太的公屋大樓內。同日晚上,何太在另一間酒店開直播,指她與何伯原本住在天水圍某酒店,卻慘遭「黑粉」投訴,被酒店趕走!她大罵該酒店和黑粉,更與何伯要求與房屋署署長羅淑佩以及局長何永賢對話。
何太在直播中多次強調自星期五起何伯已沒有再住在該公屋,只是會回去煮飯、洗衫、執行李等等,全部有閉路電視為證,並沒有違規,但仍再被房署職員「搞」,促請何局長要正視問題:「房屋署局長聽住呀你!你果兩位手下已經聽到,我哋收到都照做㗎喇,我老公即日已經搬出去住……」她表示希望有關當局秉公辦理,不要在不知情的情況下任由下屬亂講亂做,更用粗口鬧爆房署職員,指自己是被其他人逼害:「房屋署做做吓都亂嚟,我真係頂佢唔順!今晚我忍無可忍,果日星期五,你竟然咁決絕,你話最後一日,我都執行,果晚之後我老公都冇再喺果度瞓。今日又嚟搞我,我都鬧咗佢一身。我都失晒控,你都亂嚟嘅?」何伯認為黑粉唔抵得夫妻恩愛,兩人大呻這幾日花了幾千蚊住宿費,住酒店又被人投訴、趕走,簡直沒有天理:「根本呢,不法分子呢,好快大亂呀!不擇手段搞我哋!老公無得住,佢都要出去騷擾人哋酒店老闆呀。一個社會係咪應該咁樣?」不過講吓講吓,何太突然又鬧何伯,稱是他之前曝露了酒店住址,才會令「黑粉」知道:「次次都係你暴露咗先搞到今時今日,你仲未知死?」之後又自爆現如今住在李嘉誠旗下的酒店:「我專登搵香港首富投資嘅酒店嚟住!我就唔信冇人炮製你呢班胡作非為嘅人!我要睇下香港首富會唔會俾你威脅得到!黑粉敢唔敢威脅人,未食過國家糧、皇家飯!」何太亦有安慰自己,指婚後未試過同何伯度蜜月,如今就當作去酒店度蜜月。