巾幗梟雄之懸崖｜程浩駿入行7年演超過30次古惑仔 曾心灰萌退出念頭 因監製一個電話重燃演藝火

開頭睇，大家都以為曹大虎係衰人，但其實佢係一個可憐人。

相信不少人對於飾演曹大虎的程浩駿覺得熟口熟面，由於身形龐大、加上唔笑時樣子確實有點兇狠，Hellston自2017年加入無綫後，飾演過的古惑仔及江湖中人角色不計其數，他接受tvb.com專訪時，坦言非正式統計演過至少30次惡人，包括「任何年代的古惑仔、黑社會及手下」，並笑言因為熱愛演戲，所以「咩角色都唔會推」。

談到演了多年惡人，最終憑惡人贏取關注，Hellston笑言能夠被觀眾留意，是很大的快樂，並感謝《巾幗4》監製嘟嘟：「佢會留意到我就算只係手下甲、乙、丙，打手ABC，都真係有心做，同埋佢會諗吓有咩角色啱我做。無論《降魔的》、《愛上我的衰神》及《巾幗4》，嘟嘟都畀我嘗試咗啲我未做過嘅角色，其實曹大虎唔係淨係蝦蝦霸霸，佢都算係幾悲情嘅人物。」之前嘟嘟受訪時，曾大讚Hellston很有演員天份，很懂得發問對塑造角色有用的問題，對此Hellson笑言：「其實無論我問幾多問題都好，嘟嘟都好有耐心咁去答我，從來唔Hea我，真係會同我分析，教我點樣去演，令我演時更有信心。」

其實除了演惡霸，Hellston近年還加入了「奬老」行列，但原來都是因為嘟嘟，因為在《愛上我的衰神》中飾演飲食KOL「忌廉賓」演得出色，Hellston獲曾志偉賞識加入《開心無敵獎門人》做「獎老」。而嘟嘟及《巾幗4》，亦令一度對演藝事業心灰意冷的Hellston重燃鬥志及希望：「其實喺接拍《巾幗4》前，我係真心有諗過離開呢行，因為嗰時極度低潮、迷惘，入不敷支啦，見唔到自己喺呢行嘅未來，有諗過不如算數，出去求其搵份萬零、兩萬蚊嘅工、以後安安定定就算，但嗰刻我都仲係好鍾意演戲。」

「但嘟嘟一個電話打嚟，我就決定唔走住，拍埋先走，嗰個半月我拍得好開心，無論同演員或幕後嘅相處，都令我重燃番嗰團火。我覺得其實我唔辛苦都辛苦咗咁多年，講真六、七年啫，有啲人捱咗幾十年都係咁，不如我繼續啦。呢個角色令我知道我仲有好多嘢未達到、未追求到，我好想繼續去做，我諗如無意外我呢世都唔會轉行，可能我會喺出面繼續搵住其他工、炒吓散，唔使拍劇時我會搬屋，去搵啲出日薪嘅工作去維持住個生活，然後繼續去追夢。我唔想辜負自己曾經讀過呢科（Hellston畢業於香港浸會大學電影學院表演系）、努力咗咁多年、同埋所有賞識我嘅人，咁好啦，我就繼續撐落去啦，或者好快見到曙光哩。」Hellston亦坦言不介意邊做演員邊送外賣或搬屋：「我冇乜包袱，況且都係等人開門就咁遞畀個客，冇人會認得，加上我又唔係偷呃拐騙，只係努力搵錢開飯。」

Hellston確實一直有努力積穀防饑，除了炒散，還跟朋友合資開設製作公司，之前還跟教育界合作，推出協助老師們準備北上交流的網上行程，利用VR技術減輕老師和學生的功夫，不時執到正一正出入學校傾生意。除了搵錢叻，Hellston私下還是足球健將，更曾於阿仙球足球學校教踢波：「我都踢咗十幾廿年波，中學時踢過半職業、乙組聯賽，亦曾經喺阿仙奴足球學校教過波、做過教練，但入咗行之後冇乜時間再去教，踢波變咗業餘同興趣。」