胡定欣專訪丨胡定欣演「七爺」外剛內柔 女強人激罕曝露柔弱一面：唔係樣樣都咁強勢

情緒去到極致，定欣坦言最初並不習慣，加上如何演繹一個年代劇和人物，對其而言仍學習怎樣拿挰才是最好，「劇集播出自己睇番都會檢討點樣做得更好，同時有啲場口亦令我感受到真係要用呢個效果嘅情感表達先到位。」

由接拍到演出，外界對其演繹聲音不絕，皆因她背負着「經典系列」的重擔，觀眾會有所期望，定欣直認初時必定會有壓力，「我諗個壓力來自於唔同階段 ，由開頭大家知道我接拍，到我自己對演出嘅要求，直至到播嘅時候，觀眾對我嘅評價等， 即使我知道幾唔需要將佢放大或者唔好畀佢影響，但唔多唔少總會有。」

即使承受不少壓力，定欣很快調節心態，當劇集播出後，聽到觀眾叫她「七爺」，給她支持讚賞，對其而言所付出的努力一切也是值得， 同時今次的拍攝亦令其感觸良多，「我覺得拍呢套劇比其他劇角色嘅感受會多好多， 到依家我都唔能夠就咁去講表達到整個拍攝嘅感受。」

她自言拍攝以來從未試過有此復雜的情緒，即使現在重看一些場口甚至一件戲服也令其回憶湧現：「好似嗰件白色喱士衫，到依家都會勾起我拍攝嗰陣嗰份重擔或者當中嘅辛苦，我從未試過咁樣，所以今次有好多感受。」

第一集「七爺」出場，已讓觀眾看到其不足，甚至質疑她的能力，對此定欣直認初時對劇本也有疑惑：「因為同我想象中嘅女強人唔同，加上之前幾輯寫嘅巾幗唔係咁，自己都會有疑問，所以後尾我明白到其實今次係想畀觀眾睇到佢成為巾幗前經歷咗啲咩， 即使佢繼承父蔭， 都背負咗唔少壓力。」

「七爺」在人面前霸氣十足，銀行的所有決策也以她馬首是瞻，其實內裏有苦自己知，而定欣正正便是想呈現到角色脆弱一面，「大家見佢表面好風光霸氣，但內裏背負承擔嗰份責任同重擔， 外人係睇唔到甚至唔理會，所以直至她遇上柴十七，大家由債仔債主變成上司下屬， 再成為朋友跟住互生情愫，令我了解到幾強嘅女人都需要人幫助。」

在定欣眼中這個角色十分立體寫實：「我哋見到嘅女強人上司， 你都未必夠膽關心佢或者會覺得佢坐得呢個位，梗係承受得起， 而『七爺』對住唔同人有唔同面貌，但佢都係有血有肉嘅人會有脆弱一面，需要別人嘅關心同幫忙。」

她續說：「就算幾強嘅女性，唔等於樣樣方面都咁強勢，只不過做嘢嘅時候需要有呢個狀態面對佢嘅工作同下屬，返到屋企自己喊都唔會畀人知 。」

戲如人生，這份在大家眼中的「強勢」和「硬朗」特質，也是外界對定欣的標籤，難怪她有所感受，「 大家只見到我工作嘅一面，但背後所承受嘅壓力，我唔會表露出嚟或者放大同大家講，所以對我嚟講個角色係好寫實。」

劇中的她是重情重義的人，定欣自言現實中同樣是「義氣女」：「 雖然佢嘅身份係銀行女商家，但對幫佢做嘢嘅人都係有情有義，絕對唔會忘本，所以呢份重情重義同埋做嘢好辛苦想尋找本我嘅心，同我都好相似。」

由昔日青澀的小妹妹，隨着時間成長蛻變，今日的定欣演技成熟，搖身一變成為兩屆視后，在觀眾心中實力無容置疑，今次她與祥哥（黎耀祥）8度再合作，二人默契依然，劇裏他們呈現《巾幗》的情義，願意為對方捨命相救，當中那份情令人動容，難怪定欣自言是次與對方合作為最成熟以及經歷最多階段的一次。

二人相知相交，明明相愛，惟「七爺」自知有病決定放手離開，望柴十七能找到更好的女生相伴一生，就如歌詞一樣「甘願化振翅紅蝴蝶」默默守護對方。

當中一場感情戲定欣更說到眼濕濕，言詞間感受到其那份的感觸，「講我將柴十七交到澄澄隻手，我喺人頭間望住佢唱歌，要裝作開心祝福無事，我望住祥哥嘅眼神到依家仲好深刻，就係正正因為我哋合作咗8次，大家有嗰種默契信任，先達到咁好嘅效果。」

最叫人感動，並非用對白交代二人的感情，而是他們用眼神和行為表達對對方的「愛」，這一切足以勝過千言萬語，「我哋唔係口講嘅情情搭搭，反而用行動表達關心，大家之間個感情係收埋，放喺心上已經足夠，我覺得呢種啱啱好係好正，所以自己都好鍾意尾段同祥哥嘅感情位。」這就是「柴十七」與「七爺」之間獨特之情「留守最尾一起哪怕歷劫」。