巾幗梟雄之懸崖｜林敬剛演活衰格監獄頭目 硬啃豬餿一幕勁逼真全因做過飲食生意？！

《巾幗4》再有新角色登場，就是飾演衰格監獄頭目文青哥的綠葉演員林敬剛。劇情講述十七（黎耀祥飾）因龍四海（蕭正楠飾）背後操控遭誣告入獄之餘，還要面對被收買的同房囚犯及文青哥欺凌。生性好賭、講大話唔眨眼，兼愛濫用職權恃勢凌人的文青哥，出場未幾即老屈一眾囚犯逃獄，並對眾人加以凌辱。期間七爺（胡定欣飾）拉隊到獄中為十七及韋豪（羅天宇飾）出頭，十七趁機「反嫁禍」文青哥、逼令文青哥當眾硬啃混入了尿液的豬餿…

林敬剛的演出相當亮眼，每次出場都製造一定壓迫感！首先在眾人緊張被冤枉殺人而被判死刑的韋豪能否脫罪時，文青哥竟以審判結果開玩笑，並對韋豪冷嘲熱諷；而飲餿水一幕，林敬剛更是演得相當逼真，為了死撐自己沒有虐待囚犯，文青哥焗住當眾生吞臭味熏天的餿水，期間林敬剛演活了極度噁心的狀態之餘，更青筋暴現兼滿面通紅！林敬剛受訪時笑言拍攝時，直頭將那堆東西幻想成糞便幫助投入：「因為我喺香港同內地都做過飲食，啲冷飯菜汁回收嗰桶嘢就係豬餿咁，都真係幾難聞。只要觀眾諗：『萬一我食呢桶嘢，點食呀？』，或者覺得『佢真係食緊屎咁喎』，只要令觀眾投入到、更加覺得你抵死就夠架喇，我當時直頭當桶嘢係屎咁食。」問到林敬剛當時吞進肚內的到底是甚麼時，他笑言：「個桶同我食落口嘅係兩樣嘢嚟，我食落口嗰啲，有少少似酸辣湯，都暖暖地嘅。」