由劉家豪總監製、陳志江監製、岑國榮、孫浩浩擔任編審的《逆天奇案2》，逢周一至周五晚八點半翡翠台播映。昨晚首個單元故事「殺手的終極任務」正式落幕，原來霍太（麥玲玲飾）因為炒燶股票要填氹500億，故利用殺手執行暗殺任務來討好哈多爾富商巴金，希望藉此機會翻生！
之前玲玲姐在同由劉家豪及陳志江監製的《法言人》中，已憑自掏腰包打造「七彩套裝」贏盡焦點，今次玲玲姐再下一城，繼續自掏腰包打造彩色套裝世界，在短短一個單元中，已展示了六款Sharp爆造型，除了夠貴氣、夠霸氣，望落更有型有款，相當切合角色，這次玲玲姐更會以「套裝裙褲」上陣，目的就是為了配合開槍及動作場口，十分專業。玲玲姐笑言是受家豪哥啟發：「今次所有衫都係自己特別搵人做，本來家豪哥話其中一套要有條褲，但我覺得自己唔會着得好睇，倒不如做裙褲。」玲玲姐又指由於自己身形與一般女藝人有差異，在不想麻煩服裝部同事情況下，才另外找人度身打造，並感激相關同事全程予以配合及溝通：「Cindy（服裝同事）話要咩款式，我就搵人做，佢哋都有要求架，好以有啲衫要釘珠咁，咁其實for我嚟講都係好好玩嘅。」
談到劇中動作場口，玲姐姐笑言難度不高，皆因自己一向有做開運動：「揸槍梗係好玩，我鍾意拍劇就係因為可以做到現實中冇可能做到嘅嘢，今次玩得好開心！當然現場有武指教我點樣開槍嘅，唔好睇我咁嘅身形，由於我有做開運動，好似跑步、拎住啞鈴跳舞咁，所以都幾靈活架。」玲玲姐續指今次拍攝最辛苦，反而是要適應拍攝環境及氣溫：「今次辛苦在天氣好熱，又要去一啲石屋。我記得拍嗰日仲落雨，又濕又多泥，喺泥地根本行唔到，好『呢HEA』，同恐怖分子傾嘢嗰間屋哩，老鼠、曱甴咩都有，唔係講笑！雖然辛苦，但見到成效好就會好開心。」
