由阮兆祥、李思捷、王祖藍主持的扮嘢真人Show《象牙世家古象牙工藝品呈獻：福祿壽訓練學院》，為求每一集都令觀眾有驚喜兼「估你唔到」，本周日晚八點於翡翠台播出勞師動眾的頒獎禮篇。除了3名導師及24名學員會傾盡所有、各施各法扮鬼扮馬，福祿壽還會廣碌人情卡邀請大批好友嘉賓蒞臨助陣，今日首先曝光的助陣好友是擔任大會司儀的林曉峰，其餘嘉賓陣容則於稍後新聞稿再作公布。
延伸閱讀： 福祿壽訓練學院｜24位學員分隊懶人包！3大強勢組合 爭奪真正扮嘢王（附Top Student名單）
在首集以「戀柱」及「Just a 竹」 造型引發不少話題的兩位「扮工室助理」郭珮文（Juliana）及陳懿德，來到頒獎禮篇自然不敢怠慢，除了會以超亮麗晚禮服登場外，還會扮演不同風格的「人肉獎座」，並會無定向在節目不同環節「老是常出現」兼瘋狂自轉，以搞怪造型刺激觀眾眼球。「人肉獎座」對於兩位助理主持來說繼續是很大挑戰，除了因為連身衣造型難Carry之餘兼很難著外，由於2人要在長達十數小時的錄影過程中多番舉起雙手「扮獎」，故對二人來說亦是體力挑戰！
而在第一、二集扮「碌竹」的德德，今集獲製作組貼心照顧為其度身訂造「假手背囊」，好讓德德肩頸得以休息，令德德大呼感動：「製作組驚我個膊頭同條頸太攰，所以就為我設計咗呢隻假手，等我唔使將隻手舉足十幾個鐘咁辛苦。但原來佢都幾重同幾掗拃，我頭先喺走廊都唔小心攻擊到幾個路人，工作人員笑我係『最強武器』。」談到打造造型過程，德德坦言單是為身上的金色菲林「定位」已花掉兩小時：「總共有幾個姐姐係咁釘釘釘，我都有意外被拮咗幾吓，好難先可以令到啲菲林fix到位。」德德續指著衫及除衫亦是十分艱難：「除衫都要幾個人幫手，好似金蟬脫殼咁，著嘅時候又係四、五個服裝姐姐一齊出力、幫我將件衫轉轉轉番上去。」德德續指由於造型相當難搞，故此她亦盡量少飲水避免去洗手間。
持續十數小時高舉「金電視」考驗臂力
至於Juliana的造型，單是臉上金色部分也要分先後兩次上色，即使沒有菲林加持，耗時亦需要兩小時。Juliana的造型同樣蝦人著，皆因設計超級貼身，問到擁有美好葫蘆形身段的Juliana穿造型前有否刻意節食，Juliana呈放棄狀態謂：「放棄咗節食架喇，有肚腩都唔緊要啦。我冇特別打底呀，因為呢件衫好薄，打底嘅話會好明顯。呢件衫去廁所要成套除晒，同埋自己一個係拉唔番件衫上去嘅。」Juliana又笑言該身造型有一個意料之外的side effect，就是令她一整天與外界失聯：「因為隻手係包住晒，所以成日都用唔到手機。」除了造型惡搞，Juliana在頒獎禮篇的任務亦十分惡搞，為了配合節目錄影及效果，Juliana需要十數小時持續舉著一個「金電視」，雖然「金電視」是由發泡膠打造，但要長時間舉起亦相當考驗體力及臂力，現場所見，Juliana每逢嗌cut，都必定會一臉辛苦地放下「金電視」回氣，但一Roll機亦馬上入戲展現笑容。Juliana錄影前亦笑言對自己的臂力沒有信心：「以前我手力好好架，但因為四、五年冇做過運動，依家都有啲擔心。」
