TVB台慶｜陳懿德紫色晚裝晒深長事業線 自爆圓夢台慶司儀感動到喊

TVB台慶日前圓滿結束，陳懿德（德德）當晚分別以兩套晚裝亮相，紅地氈上德德化身公主，毫不吝嗇展示驕人身材，豐滿上圍及小蠻腰相當吸睛。擔任司儀時德德則換上Deep V紫色禮裙，性感與優雅兼具，簡直靚爆鏡！

德德日前（21日）還在社交平台Po出多張花絮美照，並發長文表示第一次擔任台慶主持人激動心情：「台慶司儀 係每個司儀嘅夢想舞台，我都唔例外 入行之後一直以呢個為我嘅目標，就係今年 入行嘅第三年 呢個願望竟然真係實現了，好多謝大家嘅信任，亦都好感恩可以成為呢個mc team嘅一員，多謝每一位前輩嘅身教 令我知道自己有咩要進步，多謝每一位第一次做台慶嘅同伴，好開心好感動有你哋一齊衝，老實講 知道自己有份做台慶司儀嘅時候，真係感動到喊 因為無諗到真係成真了！但又要叫自己保持平常心去面對，如果唔係會太緊張 會做得唔好，但原來出場前 都會有一種抖唔到氣嘅感覺，我諗呢種就係夢想成真 腎上腺素飆升嘅感覺。我好享受做司儀 好似人生入面要面對好多變化同挑戰，然後再逐個迎刃而解，上次做港姐司儀嘅時候 有人話有懶音，但其實26年嚟 我都唔知咩先係正音，所以今次我特登搵咗一位配音員教我咬字，希望話比大家聽 我對做司儀係好認真的，可能我仲新，但我應承大家，陳懿德會繼續努力 做到每次進步！See you at the next show。」