與天地對話｜余文樂初入行已萌生退出念頭 親解黑面因由：其實我好怕一下子要面對好多陌生人

獲譚詠麟一句說話點醒捱足廿年
初出道的余文樂，因在街上被發掘加入演藝圈，第一個工作已是拍攝台灣偶像劇《愛情白皮書》，令不少人羨慕不已。但原來對余文樂來說，反而是壓力的起源，其中一個原因是未能適應如何面對傳媒：「當時因為好細個，18歲咁上下…仲讀緊書，我諗我係比較唔能夠適應好突然地長期咁被報道、或者要面對記者…其實我係好怕一下子要同好多陌生人不斷咁溝通，同埋要揾嘢講，咁變相就會令人覺得你態度好似唔係好好喎，成日都黑面。其實係我好驚，好怕去面對呢一種環境。」當時余文樂因有感自己真的太不適應，一度想離開娛樂圈，但最終因為譚詠麟的一句說話，一留就留在娛樂圈近二十年，余文樂憶述譚校長當年一番話：「你唔做，冇人逼你，但佢話你係咪就咁因為過唔到自己而放棄呢？定抑或你會選擇過咗呢一關？你有咗選擇，先去選擇放棄呢？」直到今天，余文樂仍覺得自己對演藝工作抱有熱誠：「當然你可以話呢個係工作，但都要對你嘅工作有熱誠先可以做到落去，我覺得我自己都仲有嗰個熱情喺度。」

余文樂另外還會大談在演藝圈過去的二十個年，如何要同時適應與家人聚少離多的生活模式，以及瘋狂的飛行schedule，萬勿錯過。