TVB台慶｜車婉婉入行32年以自身經歷勉勵後輩 首踏台慶舞台任司儀激動大叫：好夢幻呀！

負責主持《值得被看見的凡星》的車婉婉，在47位新星表演及自我介紹後,徐俆步出台,並向一班後輩大拋勵志金句「喺台上有啲朋友仔，有啲入咗行三年，有啲入咗行五年，甚至更耐嘅時間，觀眾朋友未必對佢哋好認識，唔係好認得佢哋嘅樣，唔係好知佢哋個名，但我知佢哋每一個每一日都好熱心，為自己熱愛嘅電視事業去打拼、去努力！我望住你哋，我諗番當日嘅我自己，我係新秀，入咗行32年嘅車婉婉，真正第一次可以主持一個節目，係（入行）30年後嘅《中年好聲音》，今晚好榮幸第一次嚟到台慶嘅舞台，成為司儀團隊其中一個，好夢幻呀！好感恩呀！所以，我好想同大家分享，真係要繼續努力架，因為有一日，（哽咽）可能有個人會畀機會你，努力、堅持，唔好放棄，頂住！因為你新一頁嘅人生，就你用雙手創造出嚟，我想借大家雙手，大力畀啲掌聲佢哋好冇呀？鼓勵吓佢哋！」隨即引發全場熱烈拍掌，場面相當感人。