《反黑英雄》昨晚（11日）播出的第十四集，飾演林冰的何沛珈（Roxanne）被飾演墨西哥販毒集團首領「獅子王」莫浩峰Sebastian瘋狂暴打，Roxanne被連環叉頸、掹頭髮拖行兼變人肉排球，畫面極度震撼！
劇透懶人包： 反黑英雄劇情｜全25集劇透懶人包（持續更新中）黑白兩道交鋒 陳山聰/張振朗/袁偉豪/姚子羚/朱晨麗
原來相關場口是Roxanne處女打戲，談到在劇中被打得勁甘，其中一幕更要被大枱「降」頸，Roxanne受訪時透露為求效果逼真，盡量親身上陣：「撞落書架、掹頭髮嗰啲位，我都係盡量親身上陣，係真係會痛嘅，不過出到嚟見到效果好真實，就覺得所有嘢都係值得。」護士出身的Roxanne，笑言投入拍戲令她對衛生的講究也大大降低：「無論環境有幾污糟、我都可以照樣零掙扎咁喺嗰度爬一日，都好多謝監製畀呢個機會我去嘗試，我都估唔到自己喺拍嘢時會忘記晒所有框架。」投入至忘我的Roxanne，又謂連拍攝時整親也不自知：「返到屋企先見到原來手指損左，膝頭哥又瘀咗。」Roxanne又感激山聰在其拍攝喊戲時給予不少力量：「場喊戲我覺得都幾大挑戰，因為係當日先收到劇本，去到真係要拍我同導演先至溝通好點樣去完成呢場戲。好多謝山聰提我盡量放鬆去做，佢搭住我膊頭嗰下畀到好大力量我。」
談到劇中家居Look將其逆天長腿展露無遺，Roxanne笑言是靠鏡頭搭救，並大讚劇組專業：「其實每套劇不論係監製導演或是攝影師都對佢哋嘅工作好盡責，一定會盡量將演員最好嗰面拍出嚟。同埋可能因為拍《反黑》嗰段期間我開始練馬拉松，所以成個身形會fit啲。」
