異空感應｜丁樂鍶演變態戀愛腦獲讚靚女兼好戲 網民封「趙希洛2.0」 現實生活兼顧禮儀師工作

談到拍攝難忘事，Janice笑言是「深愛阮浩棕」：「有時同阮浩棕對戲，會Feel到佢對我嗰種厭棄，一望到咁樣我就有啲驚，覺得自己好難愛上呢個人，加上我哋拍之前完全唔識大家，所以成件事並唔係想像中咁簡單，我最後唯有打畀張達明老師嗌救命，佢就教咗我一啲快速投入角色嘅方法。（點解會搵張達明？）之前Join過佢嘅演技班，佢喺我心目中係師父，佢真係好似爸爸咁，就算個Course完咗，你有咩問題佢都好Welcome你打去問佢。」Janice續指造型上「愛的紋身」及刀疤，也是難度所在，皆因相當花時間及功夫：「拍嗰時天氣都幾乾燥，著長袖衫會好易整甩個妝，所以要不停邊拍邊補；同埋因為啲刀疤要用風筒吹乾，所以都會流血同爆拆。仲有就係啲刀疤要Keep住相同嘅數量啦，有時都要謹記住同提番個化妝師。」

另Janice早前出席活動時，曾提及除了拍戲追逐演藝夢，還因為阿姨關係有兼顧禮儀師工作。問到Janice平時主要負責工作時，她說：「阿姨主要為基督教同無宗教嘅喪禮儀式做禮儀師，有時係追思會、亦處理過火葬同土葬。太傳統嘅儀式我未必好幫到，我多數都係執頭執尾，可能係幫手疊番靚啲花，例如幫手剪靚同疊靚啲花、然後畀賓客放喺棺木上，又或者睇吓家屬需唔需要幫手處理帛金，又或者喺佢哋心情好差時，有咩幫到手都盡量去幫手。呢個行業最大嘅難處，可能係有時見到逝者嘅親友好傷心咁喺度喊，就算自己受到感染都要盡量忍住唔好喊，要盡量保持番個平衡。同埋每位家屬要求都會唔同、唔同場地做法亦唔一樣，土葬和火葬也是不同處理方法，所以要學習的東西很多。」Janice還指由於屍體有分級別，故並不是所有儀式都能夠安排瞻仰遺容。