異空感應｜陳曉華「臭脾上司」霍健邦演老差骨入型入格！入行逾20年因被指似鄭伊健獲邀加入兒童組

由於石Sir在劇中常伴可嵐左右，除了會一臉權威地盤問犯人，更會大展身手捉拿賊人，角色相當有發揮。對於霍建邦的演出，加上老油條台辭相當入肉到位，不少網民均大讚霍健邦Kenneth演老差骨入型入格，更有人懷疑Kenneth本身是真‧警察才會如此神似。談到角色獲讚老油條味濃，Kenneth笑言略嫌「唔夠惡」：「收到劇本之後，我就嘗試去諗呢個角色嘅層次同背景！我都有問過好多警察朋友嘅意見，睇吓點塑造呢個角色（因為我親眼見過佢哋真係成日咁樣鬧啲下屬）。其實我平時都好少鬧人，套劇出咗街之後，我都覺得自己好似唔係好夠惡（可以再多啲）。」

Kenneth續指，試造型當日，險些因為剃鬚出事：「當日朝早我剃晒啲鬚，諗住青靚白淨咁返去試造型！點知返到去監製Amy姐見到我同我講：『咦？點解你剃晒啲鬚嘅？呢一個角色係一個老差骨嚟架！我就係要你留鬚個樣！』」

其實Kenneth本身性格較為文靜，年青時更因有監製覺得他樣子似鄭伊健，而安排他加入兒童組，結果一做就做了十年：「係呀，我都做咗一段長時間嘅兒童節目！由沙士年代pay Channel開始，到《放學ICU》，再到一個年青人節目叫《激優一族》，之後就再返番去拍劇。」

翻查資料，Kenneth於2001年入讀無綫訓練班，與劇中另一實力綠葉演員蕭徽勇是同學，其他較為人熟悉的同學仔還有黃嘉樂及鄭世豪；而當年指導他們的導師則有羅冠蘭、李成昌、廖啟智及詹瑞文等，位位都是演得之人。