異空感應｜34歲吳沚默演三孩之母柔弱狠毒潑辣兼備吸好評真實性格囉嗦勁有「媽咪格」

點讚

撰文：電視精二師兄

發佈日期：2024-12-06 21:45

異空感應｜34歲吳沚默演三孩之母柔弱狠毒潑辣兼備吸好評真實性格囉嗦勁有「媽咪格」

第二個單元個案已正式落幕，真兇竟然是三子之母阿麗（吳沚默飾），之前的嫌疑人物羅啟釗（蕭徽勇飾）、蘭婆婆（區靄玲飾）及大妹秀婷（羅毓儀飾）全數證實無辜。原來當年尚未成年的阿麗因未婚懷孕，被逼下家羅啟釗；羅啟釗雖然顧家又疼錫孩子，但阿麗卻對其嫌三嫌四，二人經常因錢銀問題家嘈屋閉，啟釗更因而患上躁鬱、對阿麗拳頭腳踢。對人生充滿埋怨的阿麗自始沉淪賭海，更拉二妹（羅皓誼飾）落水齊齊運毒賺錢，誤入歧途的二妹亦因忽然富貴變得囂張又自私，最終阿麗因經不起二妹一再挑釁及侮辱錯手殺死親生女，為了求生更不惜向親生母親蘭婆婆下毒手…

當年靠在《老表，你好hea！》中扮醜成名的吳沚默（Momo），近年每逢亮相劇集必定成為焦點，不少網民大讚她有女人味：「個阿媽好正」、「好有人妻feel」、「呢位媽媽好靚女」。細心留意，Momo是次雖然飾演三子之母，但由於太後生便當媽年紀尚輕，故每次現身均是悉心打扮，除了會穿透視裝、遇有Bling Bling裝及毛毛上衣，亮麗得嚟帶點娘味。Momo接受tvb.com訪問時，坦言這是她消化過角色背景及人設後，主動向監製Amy姐提出的意見：「因為呢個角色未成年已經搞大咗個肚，其實加加埋埋同我真實年紀唔算爭好遠，所以我同Amy姐講我哋不如試吓扮後生啲嘅媽咪，令人覺得佢好似好唔甘心、亦未ready做媽咪咁。但亦因為佢身份問題，所以貪靚得嚟又唔可以青春同Fashion，要有少少娘娘地。」

談到年僅34歲便要演媽咪，Momo不但不介意，而且還大呼好玩：「我真係第一次演有三個仔女嘅阿媽，之前最多都係懷孕，未試過生咗出嚟。其實做媽咪我係一啲問題都冇，我覺得呢個角色好有發揮。」對於被指劇中不少肢體語言都母愛滿溢，Momo竟笑言與星座有關：「可能因為我巨蟹座啦，如果相信星座嘅話，巨蟹係好有母性嘅，我喺屋企都好『媽咪』架，好囉嗦，會管番阿爸阿媽轉頭。」

除了造型，Momo角色方面的心路歷程及變化亦勁有發揮空間。起初，當大家還未得悉她是兇手時，大家只覺得阿麗淒涼、軟弱又無助；不過當昨晚她露出真面目後，不少猙獰及叛逆面孔均相當到位，尤其不停數落老公的一場，嘴臉更是相當衰格。在眾多場口中，Momo於停屍期認領二妹屍體時的表現最為到位，完全演繹出作為母親的悲憤及無助，亦豐富了角色的層次。Momo受訪時坦言角色是悲劇人物：「其實呢個女人一直活得好壓抑同唔甘心，佢覺得自己犧牲咗成個人生去為咗頭家，但到頭來二妹咁對佢。其實佢殺二妹時冇為意同諗咁多，只係因為佢唔太叻又冇乜耐性，所以殺咗個女自己都唔知點算好…所以佢見到阿女屍體時嗰種傷心係真嘅。」

Momo其實出身於醫生世家，修讀香港浸會大學電影系。從小熱愛寫作的Momo，大學時期已向報章投稿寫影評，之後再透過報讀藝訓班加入無綫，除了幕前的演戲及主持工作，還同時兼顧編劇工作，曾為多套TVB劇集及電影撰寫劇本，包括《老表》系列等。曾推出長篇小說及旅遊文學的Momo，2010年及11年，先後獲得「香港青年文學獎小說高級組」亞軍及「香港青年文學獎散文高級組」冠軍，難怪被冠以才女之名。